BAUKAU, 17 Marsu 2025 (TATOLI)—Autoridade Administrasaun Munisipál liuhosi komisaun organizadora hahú halo preparasaun hodi selebra loron moris Baukau ba dala-166 iha fulan-Abríl, tinan ne’e.
Prezidente Komisaun Organizadora komemorasaun loron moris Baukau, Manuel ‘Alari’ Soares, esplika liuhosi enkontru ho Autoridade Administrasaun Munisipál deside ona Konsellu Munisipál Kombatente Libertasaun Nasionál (CMCLN-sigla portugés) mak lidera komisaun hodi selebra loron istóriku referidu ho tema “Baukau ida ba Baukau-oan hotu”.
“Deside Konsellu Veteranu Baukau mak lidera komisaun organizadora. Tanba ne’e, ita hahú estabelese ona estrutura ba komemorasaun loron istóriku ne’e,” Prezidente Komisaun Organizadora informa ba TATOLI iha Vila Antiga, Baukau, segunda ne’e.
Alari salienta, komisaun organizadora deside ona programa ba eventu referidu hanesan kria atividade desportu futeból kompostu husi U-18, U40+ no futeból salaun ne’ebé sei partisipa husi klube futeból no instituisaun públika iha Munisípiu Baukau no kompetisaun desportu volleyball ne’ebé sei partisipa husi kada postu administrativu ualu ne’ebé eziste iha Munisípiu Baukau.
Atividade seluk, festivál kulturál hanesan halo kompetisaun dansa tradisionál, kompetisaun moradór, feira produtu lokál, konvoi karreta kulturál hale’u Baukau no animasaun múzika.
Aleinde ne’e, sei halo semináriu nasionál ne’ebé tuir planu konvida oradór husi líder nasionál, intelektúal Baukau-oan ne’ebé ho objetivu motiva juventude atu iha espíritu dezenvolve Baukau iha futuru.
Atividade ikus mak sei realiza misa agradesementu ne’ebé sei realiza bainhira enserra programa hotu iha komemorasaun loron moris Munisípiu Baukau.
“Ami-nia esperansa katak selebrasaun ida-ne’e sai festa ba povu Baukau no hein katak ema hotu bele fó kontribuisaun,” Alari akresenta.
Komisaun rasik sei prepara konvite atu hato’o ba líder nasionál no órgaun soberania hanesan Prezidente Repúblika, Primeiru-Ministru, Parlamentu Nasionál, membru Governu sira inklui Baukau-oan iha diáspora hanesan Austrália no Indonézia.
Tuir planu, selebrasaun loron moris Baukau sei realiza durante loron tolu, hahú loron 24 to’o 26 Abríl, ne’ebé finansia husi Autoridade Administrasaun Munisipál ho totál orsamentu rihun $10 no komisaun organizadora sei buka tan apoia husi Baukau-oan no hato’o proposta ba Ministériu relevante sira.
Baukau fundadu iha loron-20 Abríl 1859 ne’ebé deside hamutuk entre ukun-na’in no reinu Baukau-oan iha tempu kolonializmu Portugés no tinan ne’e sei selebra ba dala-166 iha loron 20 Abríl maibé monu iha loron Páskua, nune’e komisaun organizadora deside adia ba 24 to’o 25 Abríl.
Jornalista: Natalino Belo
Editór: Xisto Freitas da Piedade
