DILI, 19 Marsu 2025 (TATOLI)—Inspetora Autoridade Inspesaun, Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), Odete Viegas hateten iha trimestre dahuluk (Janeiru-Marsu 2025), AIFAESA konsege rekolla koima husi infratór sira hamutuk $32.522.
“Durante trimestre dahuluk ita halo ona inspesaun ba fatin hamutuk 247 iha Munisípiu Dili no fatin ne’ebé mak hetan infrasaun hamutuk 133 no koima ne’ebé mak ita konsege rekolla hamutuk 32.522,” Odete Viegas ba jornalista sira iha Bairro dos Grilos, Dili, kuarta ne’e.
Nia afirma koima sira-ne’e AIFAESA rekolla iha Munisípiu Dili, seidauk sura ho munisípiu sira seluk.
“Agora ekipa foin tun ba Munisípiu Ermera, Kovalima no Bobonaru, atu halo inspesaun regulár iha-ne’ebá. Maibé, iha Dili ita nafatin halo inspesaun regulár, tanba ne’e ita-boot sira haree ami horisehik hetan fali fatin ne’ebé mak indikadu bele mós la kumpri regra hanesan Padaria Brasão ida-ne’e,” nia afirma.
Tanba ne’e, nia husu ba konsumidór sira no operadór ekonómiku sira hotu katak banhira atu konsumi ai-han ruma ka sosa sasán ruma iha loja, presiza haree katak ai-han ne’e seguru mak foin bele sosa.
“Seguru mak hanesan nia la espira, la aat, maibé haree mak nia prazu liu informa kedas ba parte AIFAESA, nune’e bele kontrola. Maibé, bainhira empreza balun ne’ebé mak viola ita-boot sira-nia direitu, ita-boot sira bele hato’o ba AIFAESA no bele hato’o ba Inspetoria Jerál Traballu. Ba operadór ekonomiku sira katak ita-boot sira bele halo negósiu tanba ne’e direitu, maibé negósiu ne’e sei fó benifísiu ba públiku ka konsumidór hotu-hotu. Ita-boot sira tenke asegura katak ai-han ne’ebé mak komersializa seguru no kualidade, no ita-boot sira tenke haree armazeinamentu ne’ebé mak apropriadu atu rai ita-boot sira-nia produtu,” nia konklui.
Jornalista: Felicidade Ximenes
Editór: Xisto Freitas da Piedade
