DILI, 19 Marsu 2025 (TATOLI)—Ministériu Turizmu Ambiente (MTA) liuhusi Diresaun Jerál Ambiente, kuarta ne’e, lansa programa pilotu suku verde iha Suku Bidau Santa-Ana, Postu Administrativu Kristu-Rei.
“Atividade ida-ne’e ho objetivu oinsá mak komunidade no ema hotu tenke iha responsabilidade atu kuida lixu ne’ebé mak sai hanesan isu nasonál iha Timor-Leste,” Koordenadór Jerál Ministériu Turizmu no Ambiente, Alves Gomes Matins, dehan ba jornalista sira, iha Suku Bidau Santa-Ana.
Nia esplika, husi ida-ne’e sei kontinua ba suku seluk iha Timor-Leste ho programa hanesan iha tinan oin-mai.
Iha fatin hanesan, Diretora Sentru Edukasaun Formasaun Ambientál husi Ministériu Turizmu no Ambiente, Elisa Luisa Santa Pereira, hateten programa suku verde iha tinan ida-ne’e halo uluk pilotu iha sidade Dili.
“Liuhusi programa ida-ne’e atu sensibiliza komunidade iha Suku Bidau Santa-Ana nian bele halo jestaun ba lixu ne’e ho diak, ho ninia finalidade atu bá halo resiklajen,” nia esplika.
Entretantu, Xefe Suku Bidau Santa-Ana, Alexandrinho Mesquita da Costa, husu ba komunidade liuliu parte Suku Bidau Santa-Ana katak tanba Suku Bidau Santa-Ana mak sai hanesan pilotu dahuluk ba iha suku verde, tan ne’e hatudu ezemplu di’ak ba suku hotu-hotu iha Timor-Leste.
“Ha’u husu ba komunidade atu mantein sirkulár husi Prezidente Autoridade Munisipál Dili katak kada loron sesta tenke limpeza iha ita-boot sira-nia hela fatin. Lixeiru ne’ebé mak distribuidu ona iha ita-boot sira-nia fatin tenke tau fo’er iha-ne’ebá,” nia konklui.
Jornalista: Felicidade Ximenes
Editór: Xisto Freitas da Piedade
