BAUKAU, 20 Marsu 2025 (TATOLI)—Autoridade Administrasaun Munisipál (AAM), kinta ne’e, liuhosi reuniaun Konsellu Konsultivu Munisipál (KKM) diskute no aprova atu harii Monumentu Fundasaun Baukau ne’ebé sai símbulu unidade.
Prezidente Autoridade Munisipál (PAM) Baukau, Veneranda Lemos Martins, esplika hanoin harii monumentu referida ajusta iha ajenda reuniaun KKM nune’e sai Planu Asaun Anuál (PAA) ba tinan-2026 tanba hakarak fó rekoñesimentu ba ukun-na’in no reinu sira-ne’ebé iha insiativa deside loron moris Baukau.
“Liuhusi ema sira-ne’e, maski la eskola boot maibe sira-nia matenek ita tenke banati tuir. Ho monumentu ida-ne’e enkoraja Baukau-oan atu labele fahe malu, maibé hamutuk lori dezenvolvimentu bá Baukau,” Prezidente Autoridade Munisipál hateten iha salaun apuramentu Administrasaun Vila Nova, Baukau, kinta ne’e.
Maski nune’e, Veneranda argumenta, antes harii monumentu, bá-oin autoridade hamutuk ho entidade sira-seluk sei túr hamutuk buka halo konsulta ba referénsia relasiona ho ukun-na’in sira Baukau nian iha pasadu nune’e bele iha entendimentu kona-ba planu referidu.
Eis deputada ne’e hateten KKM nu’udár reuniaun ne’ebé aas liu iha munisípiu ne’ebé realiza tinan ida dala rua, fahe ba kada fulan-neen, tanba halo apresiasaun no delibera planu orsamentu no programa munisípiu nian.
Membru ba KKM maihusi xefe suku sira no kamada sosiál ne’ebé reprezenta ema na’in-rua kompostu husi sosiedade sivíl, Kámara Komérisu Indústria Timor-Leste (CCI-TL-sigla portugés) Munisípiu Baukau, partidu polítiku asentu parlamentár, intelektuál, veteranu, juventude, konfisaun relijioza no organizasaun promotora igualdade.
Membru KKM hanesan xefe suku importante tanba konsideradu reprezenta direta povu husi baze no hatene kondisaun reál relasiona ho infraestrutura bázika sira hanesan bee-moos, estrada, saúde, edukasaun no seluk tan.
“Autoridade Munisipál ne’e administra de’it, lori planu no programa ne’ebé aprova iha KKM bá nasionál hodi diskute, defende atu hetan aprovasaun, tanba-ne’e reuniaun kKM importante,” Veneranda Lemos akresenta.
Entretantu, reuniaun dahuluk KKM Baukau tinan ne’e, halo aprovasaun ba ajenda hanesan aprezentasaun prosesu elaborasaun proposta planu investimentu munisipál tinan 2026, aprezenta proposta loron fundasaun Baukau, proposta orsamentu no detalla atividade.
Seluk, diskute no aprova identifikasaun monumentu ba fundadór Baukau, propoin substitui naran salaun enkontru VIP Administrasaun ba naran ‘Sorumutu Wewé’ no konservasaun bee-matan sira no serimónia rituál ba bee-matan Uailia no Uailewa.
Jornalista: Natalino Belo
Editór: Xisto Freitas da Piedade
