BAUKAU, 20 Marsu 2025 (TATOLI)—Autoridade Administrasaun Munisipál (AAM) liuhosi Prezidente Autoridade Munisipál (PAM) Baukau, Veneranda Lemos Martins, konsidera Xefe Suku Bahú publika informasaun falsa iha rede sosiál.
Veneranda haktuir katak informasaun ne’ebé lansa husi Xefe Suku Bahú, Manuel Francisco Rodrigues Gusmão, relasiona ho AAM lakohi asina resivu insentivu suku nu’udár kalúnia (dún-matak), enkuantu resivu referidu importante hodi utiliza ba prosesu lala’ok administrasaun iha kada suku.
“Ne’e laloos. Ida-ne’e dún-matak de’it. Horibainhira mak autoridade labele asina resivu suku nian?,” Prezidente Autoridade Munisipál Baukau hateten iha Vila Nova, Baukau, kinta ne’e.
Autoridade Munisipál rasik rekoñese foin asina resivu insentivu Konsellu Suku hamutuk 20-resin, enkuantu suku 20-resin seluk seidauk asina husi totál suku 59 ne’ebé eziste antes iha Baukau.
Veneranda argumenta katak maioria autoridade lokál ka xefe suku iha Baukau halo relasaun serbisu di’ak ho AAM hanesan mantein kontatu liuhosi telefónema maibé úniku Xefe Suku Bahú mak sai opozisaun hasoru AAM.
“Ha’u husu ba Xefe Suku Bahú atu labele atake beibeik autoridade iha mídia, tanba ita iha fatin atu ko’alia, liuhosi konsellu ida-ne’e. Nusa la hasoru atu ko’alia?,” Veneranda kestiona.
Veneranda konfesa prezensa iha Baukau bainhira asumi kargu Prezidente Autoridade Munisipál (PAM) buka hakuak entidade hotu tanba konsideradu Baukau ema hotu nian, la’ós Autoridade Administrasaun Munisipál nian mesak.
Antes ne’e, Xefe Suku Bahú, Postu Administrativu Baukau Vila, Manuel Gusmão, publika informasaun iha pájina privada rede sosiál Facebook hodi kestiona Autoridade Munisipál ne’ebé seidauk asina resivu insentivu Konsellu Suku nian no ameasa atu taka sede suku inklui la halo atendimentu ba komunidade Bahú tanba laiha orsamentu opersionál.
Jornalista: Natalino Belo
Editór: Xisto Freitas da Piedade
