Tinan ne’e, MKI prevee rihun $200 ba Kompetisaun Negósiu Inovativu
DILI, 23 Marsu 2025 (TATOLI) – Ministériu Komérsiu no Indústria (MKI), tinan ne’e, aloka rihun $200 ba Kompetisaun Negósiu Inovativu, iha ámbitu Projetu Kompeténsia ba Empreendedorizmu no Empregu Juventude (YEES,sigla inglés) ba étapa da-lima nian.
Diretór Nasionál Apoiu Dezenvolvimentu ba Mikro Pekena no Médiu Empreza, Reinaldo Borges,informa kompetisaun negósiu inovativu ne’e ministériu parseria ho Programa Nasaun Unida ba Dezenvolvimentu (PNUD) hodi implementa inisiativa ne’e.
Empreza sira ne’ebé bele kompete mak empreza sira halo produsaun no ba fa’an produtu lokál iha merkadu.
“Iha tempu badak ami sei lansa konkursu tanba ne’e ami husu ba empreza sira ne’ebé konkorre tenke aprezenta planu negósiu ne’ebé di’ak”, dehan nia iha Matadouro-Dili.
Programa YEES nu’udar rezultadu kooperasaun entre MKI, UNDP, Institutu Apoiu Dezenvolvimentu Emprezariál (IADE) no Ajénsia Kooperasaun Internasionál Korea (KOICA) ho objetivu atu kria oportunidade empregu no programa empreendedorizmu ba juventude sira. Projetu ne’e hetan finansiamentu husi KOICA dezde 2022.
Relembra katak iha loron 22 Jullu 2022, Ajénsia Kooperasaun Internasionál Koreanu (KOICA, sigla inglés) kontribui fundu hamutuk $5.998.176,67 ba Timor-Leste hodi implementa projetu Youth Employment Entrepreneurship Skills (YEES) ne’ebé Ministru Finansa, Rui Augusto Gomes, reprezenta Governu Timor-Leste, no Eunju Cha nu’udar reprezenta KOICA iha Timor-Leste mak asina akordu.
Apoia hosi KOICA uza ba abilidade no dezenvolvimentu emprezariál ba tinan-lima (2022-2027) hodi prepara timoroan sira asesu ba oportunidade serbisu.
Totál orsamentu ba implementasaun projetu ne’e hamutuk $7.320.946,67 kompostu husi KOICA $5.998.176,67, Programa Nasaun Unida ba Dezenvolvimentu (UNDP) $490.000 no Governu Timor-Leste liuhusi Ministériu Turizmu, Komérsiu no Indústria (MTK) $832.770.
Jornalista : Arminda Fonseca
Editór : Florencio Miranda Ximenes
