BAUKAU, 24 Marsu 2025 (TATOLI)—Autoridade lokál liuhosi Xefe Suku Buruma, Postu Administrativu Baukau Vila, Libório dos Santos Freitas, aprezenta difikuldade husi Eskola Bázika Filiál (EBF) terseiru síklu ba Ministra Edukasaun, Dulce de Jesus Soares.
Difikuldade ne’ebé eskola referida enfrenta mak hanesan laiha moru protesaun nune’e seidauk fó seguru ba infraestrutura no estudante sira, menus fasilidade hanesan meza no kadeira tanba to’o atuál kontinua utiliza fasilidade tempu Indonézia nian.
“Ami hato’o ba Ministra Edukasaun atu tau-atensaun no oinsá mak serbisu hamutuk rezolve problema edukasaun,” Xefe Suku Buruma hateten bainhira partisipa iha inaugurasaun edifísiu Pre-eskolár Buruma, segunda ne’e.
Aleinde ne’e, Liborio Freitas aprezenta mós difikuldade rua seluk hanesan EBF síklu datoluk Buruma seidauk iha biblioteka nune’e estudante sira difísil asesu livru no eskola referida sei kontinua menus profesór.
Nia haktuir bainhira eskola ne’e laiha moru protesaun, iha poténsia ba ema atu estraga infraestrutura no fasilidade eskola, enkuantu kona-ba profesór pre-eskolár iha Buruma durante ne’e laiha profesór permanente nune’e inan-aman husi estudante deside kontribui kada fulan $2 hodi apoia profesór.
Hatán ba kestaun ne’e, Ministra Edukasaun, Dulce de Jesús Soares, toma nota ona kondisaun eskola ne’ebé aprezenta husi Xefe Suku Buruma, maibé husu inan-aman kontribui atu halo lutu tanba Ministériu Edukasaun sei prioriza infraestrutura iha eskola seluk ne’ebé presiza atu fó atensaun.
“Ekipa husi ministériu observa ba sala laran haree laiha meza no kadeira. Ministériu sei responde ba ida-ne’e. Kona-ba lutu, ha’u sei la responde, tanba ita sei haree bá kondisaun eskola seluk ne’ebé sei aat,” Dulce Soares hateten.
Governante ne’e solisita dirijente eskola atu submete dadus estudante inklui fasilidade hanesan meza no kadeira ba parte Edukasaun Munisípiu nune’e kontinua ba nasionál antes apoia ba eskola referida iha tempu badak.
Enkuantu, problema menus profesór, Dulce mós husu atu autoridade suku hamutuk ho dirijente eskola presiza kontrola manorin sira tanba dalabarak profesór sira menus iha oras serbisu kada semana tenke prenxe oras 24.
“Ema ida bele hanorin husi primeiro ano to’o sesto ano, entaun sé mak oras seidauk kompletu bele ba hanorin tan iha sala seluk,” Dulce tenik.
EBF síklu datoluk Buruma filiál ba Ensinu Báziku Sentrál (EBC-sigla portugés) Tirilolo ho totál estudante ne’ebé rejistadu hamutuk na’in-500 resin no totál profesór lima.
Jornalista: Natalino Belo
Editór: Xisto Freitas da Piedade
