BAUKAU, 24 Marsu 2025 (TATOLI)—Ministra Edukasaun, Dulce de Jesus Soares, segunda ne’e, inaugura eskola Pré-eskolár Avo Ana Irena Olimpia de Almeida iha Suku Buruma, Postu Administrativu Baukau Vila.
Ministra Edukasaun, Dulce de Jesus, esplika eskola pré-eskolár Avo Ana de Almeida estabelesidu ona iha munisípiu haat inklui Baukau, nune’e agradese ba Fundasaun East Timor Trading Grup (ETTG) ne’ebé sai parseiru importante ho Ministériu Edukasaun (ME) ligadu ho investimentu setór edukasaun iha Timor-Leste.
“Ba komunidade Buruma, ha’u hein katak ita-boot sira apresia ho buat-ne’ebé iha tanba parseiru sira hili Buruma hodi harii pré-eskolár ne’e,” Ministra Edukasaun hateten iha Buruma, segunda ne’e.
Dulce Soares hatutan kompromisu ne’ebé ETTG fó bele hasa’e liután kualidade edukasaun pré-eskolár liuliu infraestrutura ne’ebé kualidade, fasilidade kompletu ho kustu ne’ebé efetivu.
Governante ne’e enkoraja komunidade Buruma atu lori oan sira atu aprende hodi prepara di’ak liután iha futuru hanesan prepara aprende, halo belun, hasoru dezafiu no prepara simu matéria husi profesór sira.
“Responsabilidade manutensaun ha’u entrega ba ita-boot sira” Dulce Soares fó nia hanoin.
Iha biban ne’e, Prezidente East Timor Trading Grup (ETTG), Saqib Awan, hateten Fundasaun ETTG konsidera Timor-Leste espesiál nune’e komprometidu kontinua atu apoiu komunidade iha baze ligadu ho setór edukasaun, tanba parte prepara futuru nasaun husi jerasaun kontinuadora sira.
“Ita haree labarik sira nakonu ho mehi, kuriozidade no potensiál atu muda mundu, maibé mehi sira-ne’e atu bele la’o, sira presiza ambiente ne’ebé ijiene (moos) no sala aula ne’ebé seguru,” Saqip tenik.
Nia husu komunidade Buruma ho estudante atu hamutuk kuida eskola pré-eskolár ne’e inklui asegura fasilidade ne’ebé atribuida ona hodibele apoia estudante sira iha futuru ne’ebé prósperu.
“Eskola mak fatin atu aprende, buras no mehi futuru doutór, profesór no líder ne’ebé iha valór ba futuru Timor-Leste nian,” Saqib subliña.
Entretantu, Xefe Suku Buruma, Libório dos Santos Freitas, hato’o agradesementu no obrigadu ua’in ba Fundasaun ETTG ne’ebé disponível apoia harii eskola pré-eskolár tanba konsideradu ajuda oan sira hahú aprendizajen iha Buruma.
“Kontente tebes. Nu’udár aman ba ki’ik-oan sira iha Buruma, fatin ne’e konsideradu espesiál. Bá- oin, ami sei utiliza ho di’ak hodi eduka oan sira,” Libório Freitas informa.
Eskola pré-eskolár Avo Ana Irena Olimpia de Almeida hahú nia konstrusaun iha inísiu tinan ne’e, ne’ebé lori fulan-rua hodi finaliza, kompostu edifísiu profesór, sala aula, garanjen inklui saneamentu.
Totál estudante ne’ebé atuál hala’o estudu iha eskola referida hamutuk 37, mane na’in-18 no feto na’in-19, fahe ba grupu rua kompostu grupu A hamutuk 14 no grupu B hamutuk estudante 23 no profesór voluntáriu na’in-rua.
Jornalista: Natalino Belo
Editór: Xisto Freitas da Piedade
