BAUKAU, 25 Marsu 2025 (TATOLI)—Komisaun Antí Korrupsaun (CAC-sigla portugés) preokupa ho prosesu implementasaun projetu manutensaun estrada urbana Baukau Vila.
Komisáriu CAC, Rui Pereira dos Santos, esplika hafoin observa projetu manutensaun estrada urbana iha Baukau Vila, diretamente hato’o ona ba Autoridade Administrasaun Munisipál (AAM) liuhosi Sekretáriu Munisipál Asuntu Planeamentu Investimentu tanba konsideradu hasai despeza Estadu relasiona ho planu reabilitasaun estrada urbana iha tinan 2026.
“Ita haree ona. Ekipa inspesaun sei mai, tanba halo (manutensaun) tiha depois sei sobu. Ne’e hasai despeza dala rua. Ami sei konfirma Diretór Obra Públika para esplika,” Komisáriu CAC hateten iha Sentru Konvensaun Baukau (CCB-sigla portugés) Vila Antiga, tersa ne’e.
Rui Pereira salienta CAC liuhosi ekipa téknika sei halo inspesaun ba obra referida tanba bainhira projetu ne’e finalizadu sei lahó durasaun naruk ka sobu hikas fali tanba Governu planeia sei reabilita estrada urbana Baukau iha tinan 2026.
Tuir nia, nia sujere ateru no taka de’it kuak sira-ne’ebé esensiál nune’e la presiza gastu orsamentu boot no hein reabilitasaun jerál nune’e bainhira gastu orsamentu labele dupla ba obra ne’ebé hanesan.
“Di’akliu emprezáriu ne’ebé kaer obra ne’e tau de’it rai-henek ho fatuk halo kabeer kareta bele liu bá-mai, hein planu alkatraun foun (reabilitasaun) ne’e,” nia sujere.
Notísia relevante: Manutensaun ba estrada urbana Baukau Vila hahú ona
Hatán ba preokupasaun ne’e, Diretór Serbisu Munisipál Obra Públika Baukau, Agostinho Ximenes, hateten projetu referida antes ne’e governu anteriór selebra ona kontratu ho kompañia iha tinan 2023 ho akordu halo manutensaun rutina ne’ebé sei ramata iha jullu 2025.
Agostinho Ximenes argumenta Obra Públika Baukau iha kompeténsia atu monitoriza, enkuantu desizaun kona-ba kontratu hotu kompeténsia tomak iha Ministériu Obra Públika (MOP) nasionál.
“Ami mós hanoin ida-ne’e maibé agora daudaun atende lai ita-nia komunidade tanba tauk dezastre,” Agostinho hateten.
Governu liuhosi Ministériu Obra Públika deside kontratu kompañia lokál tanba konsideradu estrada urbana Baukau presiza halo manutensaun hanesan normaliza hikas estrada ne’ebé kuak liuliu subida ho tipu cor nune’e prevene akontese dezastre tráfegu.
Servisu Obra Públika Baukau kontinua husu kompañia responsável atu aselera serbisu iha terenu hanesan ateru no cor kuak sira liuliu subida iha diresaun rotunda Vila Nova bá merkadu Tuanau inkluindu to’o Nagardjo ho distánsia kilómetru 3.5.
Entretantu, Kompañia Roman Grigo Unipessoal, Lda mak responsabiliza ba manutensaun estrada urbana Baukau Vila, ho totál orsamentu rihun $600, distánsia hamutuk kilómetru 23.
Akordu ne’ebé asina iha fulan-Maiu 2023 ho numéru MPW-W-280040 ho akordu serbisu rutina manutensaun liuhosi baze performasaun lokaliza iha Baukau Vila.
Jornalista: Natalino Belo
Editór: Xisto Freitas da Piedade
