VIKEKE, 27 Marsu 2025 (TATOLI)—Ministru Administrasaun Estatál (MAE), Tomas do Rosário Cabral, hamutuk ho autoridade munisípiu Vikeke fó pose ba xefe suku eleitu ba suku foun rua hanesan suku Macadique de Baixo no Macadique Uaitame ba períodu 2025-2032. postu administrativu Uatulari. munisípiu Vikeke.
Notísia Relevante: Rogério da Silva eleitu sai xefe suku Macadique de Baixo
Toma pose ne’e akontese, hafoin liuhusi eleisaun komunitária iha suku Macadique de Baixo ne’ebé eleitu husi Rogerio da Silva no xefe suku Macadike Uaitame eleitu husi José Pinto Soares.
Ministru Administrasaun Estatál (MAE), Tomas do Rosário Cabral, hateten suku Macadique anteriór aldeia hamutuk 21 ne’ebé lokaliza dodook malu iha territóriu Timór laran tomak ne’e, aldeia barak liu mak suku Macadique, nune’e daudun ne’e fahe ona ba suku tolu (3) hodi hakbesik ba komunidade.
“Tanba ne’e, ohin. ita fó pose ba xefe suku na’in-rua (2) inkui konsellu suku sira-ne’ebé kompostu husi lia-na’in, juventude feto no mane. Tan ne’e, iha serimónia pose, autoridade sira halo juramentu ona. Ho juramentu ida-ne’e, ita-boot sira atu kumpre, hodi halo tuir lei no konstituisaun RDTL, hodi serbí ba ita-nia povu iha suku rua,” Mnistru Tomas do Rosário Cabral hateten serimónia pose ba xefe suku na’in-rua iha salaun munisipál Vikeke, ohin.
Governante ne’e subliña, MAE liuhusi DNAS tempu badak sei realiza suku Macadique Uaitame no Macadique de Baixo nian funsionamentu administrasaun no sei prepara ofsiál suku kada suku ida ema na’in-haat (4) ne’ebé kompostu husi sekretáriu, finansa, sosiál no administrasaun hodi halo jestaun administrasaun ba iha suku rua nian.
Notísia Relevante: STAE konklui eleisaun suku iha Macadique Uaitame
“Ba xefe suku sira iha funsaun rua, funsaun ida povu hili imi no funsaun ida seluk ami mak kontrola xefe suku sira. Ami kontrola xefe suku sira ho razaun, atu fó prestasaun servisu ba povu. Tanba ne’e, iha munisípiu iha sekretáriu munisipál ida hodi hala’o servisu hamutuk ho xefe suku sira.
Iha biban ne’e, xefe suku Macadique de Baixo, Rogerio da Silva, kompromete katak sei serbí ba povu Macadique de Baixo ho kualidade tanba durante ne’e komunidade la sente dezenvolvimentu no atendementu sira seluk tanba aldeia barak.
“Tanba ne’e, ba loron ohin sai hanesan loron segundu referendu iha ami-nia suku Macadique. Hahú husi ohin ba oin, ha’u prontu serbí ba povu no tuir hamutuk ho konsellu suku sira hodi trasa programa príoridade ba tinan 2026 nian, liuliu ba bee-moos, estrada no seluk tán, atu ami-nia povu asesu,” nia dehan.
Tuir dadus, totál eleitór husi suku Makadique Uaitame hamutuk 688 ne’ebé kompostu husi aldeia neen hanesan aldeia Bubulita ho eleitór 239 (24%) ne’ebé kompostu husi mane 115 no feto 124, aldeia Borubai ho eleitór 95 (10%) ne’ebé kompostu husi mane 46 no feto 49, aldeia Digamasi ho totál eleiór 95 (8%) ne’ebé kompostu husi mane 34 no feto 44.
Aldeia Luruboru ho eleitór 143 (14%) ne’ebé kompostu husi mane 68 no feto 75, aldeia Matadalan ho eleitór 55 (6%) ne’ebé kompostu husi mane 22 no feto 33 no aldeia Queturai ho eleitór 77 (8%) ne’ebé kompostu husi mane 37 no feto 40.
Enkuantu, dadus eleitór husi suku Macadique de Baixo hamutuk 1.625 (163%) ho total aldeia hamutuk hitu ne’ebé kompostu husi aldeia Betulari ho eleitór hamutuk 350 (35%)-mane mane 167 no feto 183, enkuantu aldeia Gomioru ho total 227 (23%) ne’ebé kompostu husi mane 106 no feto 121.
Aldeia Koquilako ho total eleitór 141 (14%)-kompostu husi mane 57 no feto 64, aldeia Lacarate iha eleitór hamutuk 212 (21%) ne’ebé kompostu husi mane 100 no feto 112, aldeia Lau-Uma ho totál eleitór 236 (24%) ne’ebé kompostu husi mane 116 feto 120, aldeia Lutugia ho totál eleitór 229 (23%) ne’ebé kompostu husi mane 118 no feto 111, aldeia Ossolari ho totál eleitór 230 (23%) ne’ebé kompostu husi mane 107 no feto 123.
Partisipa iha serimónia pose ba xefe suku Macadique de Baixo no Macadique Uaitame hetan partisipa husi Prezidente Komisaun Nasionál Eleisaun (CNE, sigla portugé), segundu komadante Polísia Nasionál Timor Leste (PNTL) munisípiu Vikeke, autoridade lokál, funsionáriu, estudante no abitante munisípiu Vikeke.
Notísia Relevante: Xefe suku eleitu husi Macadique Uaitame sei tau prioridade ba estrada no eletrisidade
Jornalista : Vitorino Lopes da Costa
Editór : Cancio Ximenes
