BAUKAU, 27 Marsu 2025 (TATOLI)—Governu liuhosi Ministériu Obra Públika (MOP) kontinua husu kompañia responsável atu aselera projetu reabilitasaun estrada diresaun Postu Administrativu Laga bá Baguia.
Ministru Obra Públika, Samuel Marçal, esplika bainhira asumi pasta nu’udár membru Governu, prosesu reabilitasaun estrada diresaun referida hahú ona, nune’e kontinua fó atensaun ba kompañia atu finaliza reabilitasaun tanba fasilita komunidade postu rua transporta produtu bá merkadu.
“Ha’u mai haree no dehan ba sira (kompañia) atu aselera lalais,” Ministru Obra Públika hateten iha Sede Suku Samalari, Postu Administrativu Baguia, Munisípiu Baukau, kinta ne’e.
Governante ne’e enkoraja komunidade Baguia no Laga atu kontribui no labele halo impedementu nune’e bele ajuda finaliza lalais prosesu reabilitasaun estrada.
Notísia relevante: Primeiru-Ministru hakarak empreza konstrutora estrada Laga-Baguia no Quelicai-Ossú garante kualidade obra
Prosesu estrada diresaun Laga bá Baguai atualmente sei kontinua iha faze reabilitasaun ne’ebé nahe ona aspál iha área Soba to’o Teriloidae no sei kontinua to’o Saelari, enkuantu, husi Saelari to’o Postu Baguia Vila seidauk iha progresu.
“Estrada diresaun Laga bá Baguai bele dehan presiza tinan rua tan,” Samuel Marçal akresenta.
Enkuantu, seremónia hatuur fatuk dahuluk ba projetu reabilitasaun estrada Laga no Baguia iha tinan 2022 liuhusi VIII Governu Konstitusionál lideradu husi Primeiru-Ministru, Jenerál Taur Matan Ruak, ne’ebé responsabiliza husi Kompañia Norinco International Cooperation ho nia orsamentu hamutuk millaun 21.7 no totál kilómetru 38 ne’ebé tuir durasaun kontratu hamutuk fulan-18.
Jornalista: Natalino Belo
Editór: Xisto Freitas da Piedade
