DILI, 28 Marsu 2025 (TATOLI)—Embaixadór Roberto Soares, kinta (27 Marsu 2025) ne’e, simu vizita kortezia husi Embaixadora-Dezignada Repúblika Polónia ba Repúblika Indonézia no Timor-Leste, Barbara Szymanowska, iha Embaixada Timor-Leste iha Jakarta-Indonézia, hodi diskute situasaun seguransa rejionál no internasionál hodi hasa’e liután relasaun bilaterál entre nasaun rua ne’e.
“Enkontru ne’e ami troka hanoin kona-ba situasaun seguransa rejionál no internasionál no reafirma sira-nia nasaun nia kompromisu atu kontinua promove no respeita prinsípiu direitu internasionál, independénsia no soberania,” Embaixadór Roberto tenik liuhusi nota ne’ebé Agência Tatoli asesu husi media Embaixada nian, ohin.
Nia hato’o agradesimentu ba vizita Embaixadora Barbara nia vizita no destaka mós vizita istórika ida mai Timor-Leste iha tinan 1989, ne’ebé halo husi sidadaun Polónia ida, Papa João Paulo II, ne’ebé nia vizita fó kontribuisaun boot tebes ba prezervasaun identidade timoroan nian no libertasaun Timor-Leste nian.
Timoroan sira harii monumentu, estátua Papa João Paulo II iha Tasi-Tolu nu’udár sinál respeitu no hanoin hikas Papa João Paulo II ninia vizita mai Timor-Leste iha tinan 1989 iha tempu okupasaun Indonézia.
Jornalista : Hortencio Sanchez
Editór : Cancio Ximenes
