DILI, 01 Abríl 2025 (TATOLI) – Sekretaria Estadu Kooperativa (SEKoop) organiza formasaun kona-ba Sistema Informasaun Jeografia (SIG, iha inglés) no Leitura Mapa nian ba funsionáriu sira destakadu iha munisípiu 12, inklui Rejiaun Administrativa Espesiál Oekusi Ambeno (RAEOA).
Diretór-Jerál Sekretaria Estadu Kooperativa, Olderico Lopes, esplika katak formasaun ida-ne’e importante tanba funsionáriu sira bele hatene halo identifikasaun ba poténsia ekonómika ne’ebe iha, liuhusi grupu kooperativa ne’ebé eziste iha postu administrativu, suku, aldeia no hatene halo mapeamentu ba grupu agríkola kooperativa sira.
“Bainhira atu halo produsaun ruma presiza iha mapeamentu. Bainhira ita halo ona mapeamentu ba grupu sira ne’e bele halo akompañamentu no fó formasaun ba sira atu hasa’e produsaun, liuliu oinsá hasa’e ekonomia nasaun nian no ekonomia família uma-laran”, Olderico Lopes hateten iha salaun Esperenz, iha Delta, Dili.
Atividade ne’e hala’o durante loron haat no matéria ne’ebé sei hanorin ba formandu sira mak sobre Sistema Informasaun Jeografia nian oinsá apreende kona-ba uza aplikasaun Quantum Geographic Information System (QGIS) ba mapeamentu nian no halo mós prátika, nomós hanorin kona-ba oinsá uza Global Positioning System (GPS) hodi foti pontu atu hatama iha aplikasaun QGIS.
“Bainhira foti point ne’e, ita atu hatene kada kooperativa ne’e halo saida no hala’o iha ne’ebé, no to’os karik nia ektare hira sei hatene hotu, tanba GPS mak sei deteta. Alvu liuhusi GPS mak foti informasaun ka dadus no mai transforma fali ba mapa hodi hatene katak kooperativa iha munisípiu ne’e hira”, dehan.
Formasaun ne’e SEKoop mak realiza ho serbisu hamutuk ho Sekretária Estadu Floresta hodi apoia fó formasaun SIG nian ba funsionáriu sira.
Iha fatin hanesan, Sekretáriu Estadu Floresta, Fernandino Vieira, hateten maski SEkoop ho Sekretaria Estadu Floresta instituisaun ketaketak, maibé hakarak hamutuk hodi dezenvolve nasaun ida-ne’e.
Nia dehan funsionáriu SEkoop ne’ebé destaka iha munisípiu sira sai hanesan matan no tilun hodi transforma matenek polítika Governu nian hodi bele hadi’a povu agrikutór sira-nia moris.
“Imi sira ne’ebé destaka iha munisípiu, imi mak sai administrasaun tilun no matan ba ita-nia povu agrikultór sira hodi transforma sira-nia produtu ne’e bele asesu bá merkadu hodi bele hasa’e rendimentu ekonomia nasaun no família nian. Bainhira nasaun forte, ekonomia família forte”, nia afirma.
Jornalista: Arminda Fonseca
Editora: Maria Auxiliadora
