BAUKAU, 04 Abríl 2025 (TATOLI)—Estadu Unidu Amérika (EUA) liuhosi Ministériu Defeza, sesta ne’e, entrega armazein ba Komponente Aérea FALINTIL-Forsa Defeza Timor-Leste (F-FDTL).
Vise Xefe Estadu Maiór F-FDTL, Majór Jenerál Calistro dos Santos ‘Coiliati’, esplika prezensa iha Komponente Aérea atu inaugura armazein ne’ebé oferese liuhosi kooperasaun bilaterál iha área militár entre EUA ho Estadu Timor-Leste.
“Armazein ida-ne’e atu armazeina produtu no sasán sira-ne’ebé karik iha momentu ruma hasoru dezastre naturál, ita iha ona fatin atu asegura bainhira hetan apoia husi internasionál ,” Vise Xefe Estadu Maiór F-FDTL hateten iha Lanud, Baukau.
Majór Jenerál Coliati informa katak fasilidade ne’ebé iha sufisiente atu utiliza tuir situasaun atuál maibé bainhira evolusaun tempu posivelmente sei mudansa iha fururu.
Coliaiti salienta ho apoia sira-ne’e parte husi dezenvolvimentu Komponente Aérea ne’ebé fazeadamente husi baze no ho apoia EUA nian hatudu sinál mudansa nune’e dezenvolve di’ak liután hodi serbi interese nasionál no rejionál.
“Ba Komponente Forsa Aérea atu kuidadu didi’ak fasilidade sira-ne’ebé oferese husi ita-nia parseiru hanesan armazein. Presiza tebes ita-nia kuidadu no manutensaun atubele serbí ita-nia interese,” Majór Jenerál Coliaiti husik mensajen.
Iha fatin hanesan, Xefe Gabinete Guarda Nasionál, Ministériu Defeza Estadu Unidu Amérika, Jenerál Steven S. Nordhaus, liuhusi serimónia entrega armazein referida konsidera marka istória relasaun bilaterál entre EUA ho Timor-Leste.
“Guarda Nasionál sente orgullu tebes hodi serbisu hamutuk ho ita-nia parseiru sira, no ohin loron sai hanesan testamuña ba forsa Programa Parseria Estadu nian,” Jenerál Steven S. Nordhaus hateten.
Nia argumenta Guarda Nasionál Rhode Island sente onra tanba bele kolabora ho F-FDTL hodi harii relasaun iha área militár hanesan ezersísiu formasaun no fahe esperiénsia ba malu.
Jenerál Nordhaus esplika apoia referida parte hasa’e kapasidade resposta nian, ajuda salvaguarda komunidade, proteje moris no garante katak ajuda to’o lalais no efisiente ba sira-ne’ebé presiza.
Liuhosi kooperasaun ne’e bele haburas ona komprensaun mútua, respeitu no abilidade ida atu hatán ho efisiénsia no lealdade ba dezafiu sira-ne’ebé nasaun rua hasoru hamutuk liuliu iha rejiaun importante ida-ne’e.
“Ita dedika instalasaun foun sira-ne’e, atu hametin Timor-Leste nia abilidade hodi prepara no responde ba dezastre naturál,” Jenerál Steven S. Nordhaus argumenta.
Iha serimónia inaugurasaun referida, entrega mos sertifikadu ba membru komponente Aérea F-FDTL hamutuk na’in-7 ne’ebé antes ne’e finaliza kursu manutensaun aérea husi Rhode Island National Guard.
Entretantu, armazein apoiadu husi EUA hamutuk rua kompostu garajen (Hangar) aviaun no Armazein Asisténsia Umanitária no Auxíliu Dezastre (HADR) ne’ebé sei utiliza husi komponente Aérea F-FDTL.
Jornalista: Natalino Belo
Editór: Xisto Freitas da Piedade
