DILI, 02 Abríl 2025 (TATOLI)–Sekretáriu Estadu Formasaun Profisionál no Empregu (SEFOPE), Rogério Mendonça de Araújo no Prezidente Asosiasaun Dezenvolvimentu Rekursu Umanu Norte Japaun, Kazuo Suzuki, tersa ne’e, asina akordu servisu hodi haruka traballadór timoroan bá nasaun Japaun.
“Ita hotu hatene katak enkontru ohin ne’e importante tebes ba Governu Timor no Japaun, ne’ebé liuhusi Asosiasaun Dezenvolvimentu Rekursu Umanu sei simu ita-nia joven sira bá servisu iha Japaun iha fulan oin kona-ba programa empregu,” Rogério Mendonça de Araújo, hateten ba jornalista sira iha Kaikoli, Dili.
Nia dehan, importante traballadór timoroan sira prenxe rekizitu sira hanesan hanesan iha abilidade lian Japaun no hatene respeita ema adultu sira.
“Traballadór sira sei servisu iha área agrikultura, ortikultura no florestál, inklui atendimentu ba idozu sira,” nia afirma.
Nia garante katak timoroan sira preparadu ona atu kompete ba Japaun nia fatin liuhosi sentru formasaun sira.
Iha fatin hanesan, Prezidente Asosiasaun Dezenvolvimentu Rekursu Umanu Japaun Norte, Kazuo Suzuki, informa rekrutamentu dahuluk hosi traballadór sira sei envolve ema na’in-sanulu hodi serbisu iha nasaun ne’ebá.
“Ami sei haree rekrutamentu dahuluk no kontinua halo rekrutamentu hodi aumenta númeru traballadór bá Japaun,” Kazuo Suzuki relata.
Responsável ne’e hatutan katak durasaun servisu ne’e entre tinan tolu to’o tinan lima, maibé traballadór sira ne’ebé hakarak kontinua ho empreza ne’e bele fó oportunidade atu hanaruk sira-nia kontratu.
Nia haktuir, empreza Japaun barak liu mak to’o agora seidauk hatene kona-ba ezisténsia no lokalizasaun jeográfika Timór Leste nian, maibé asosiasaun bele introdús empreza seluk hodi rekruta traballadór sira.
Jornalista: Felicidade Ximenes
Editór: Xisto Freitas da Piedade
