BAUKAU, 08 Abríl 2025 (TATOLI)–Autoridade Administrasaun Munisipál Baukau (AAM) durante trimestrál dahuluk ezekuta ona orsamentu jerál Estadu (OJE) tinan 2025 hamutuk pursentu 14.
Sekretáriu Munisipál Asuntu Administrasaun no Finansa, Juvinal Daniel Filipe Belo, esplika husi pursentu 14 referida korreponde ba orsamentu millaun $1.7 husi totál orsamentu ne’ebé prevee ba Baukau hamutuk millaun $12-resin.
“Ita-nia obrigasaun kada trimestrál tenke ezekuta pursentu 25, tanba ne’e iha trimestrál daruak ita esforsu atu atinje pursentu 50,” Sekretáriu Munisipál Asuntu Administrasaun no Finansa Baukau informa ba TATOLI iha ninia kna’ar fatin, Vila Nova, Baukau, tersa ne’e.
Juvinal Belo salienta orsamentu millaun $1.7 referidu ezekuta ba kategoria sira hanesan Saláriu no Vensimentu rihun $593, Bens no serbisu rihun $144, Kapitál Dezenvolvimentu seidauk ezekuta tanba iha iha faze preparasaun pagamentu ba projetu Programa Dezenvolvimentu Integradu Munisipál (PDIM) tinan 2024 no PDIM tinan 2025 hafoin anúnsiu públiku husi totál orsamentu hamutuk $1.407,212.
Enkuantu, kategoria Transferénsia Públika ezekuta ona ba atividade Programa Nasionál Dezenvolvimentu Suku (PNDS), subsídiu ba membru Konsellu Suku no merenda eskolár hamutuk $969.225,4 hosi orsamentu $7.455,580.
“Ita-nia ezekusaun orsamentu ne’e mós determinante atu avansa ba podér lokál no desentralizasaun administrativa, tanba ne’e ita tenke kumpri regra ezekusaun,” Juvinal Belo akresenta.
Autoridade Baukau ba tinan 2025 hetan alokasaun orsamentu hamutuk $12.437.747, fahe ba kategoria haat hanesan Saláriu no Vensimentu $2.812,445, Bens no Servisu $772,510, Transferénsia Públika $7.455,580 no Kapitál Dezenvolvimentu hamutuk $1.407,212.
Entretantu, dadus husi portál transparénsia Ministériu Finansa, loron ohin (08/04/2025) ne’ebé Agênsia TATOLI asesu, ezekusaun orsamentu Munisípiu Baukau trimestrál dahuluk foin atinje pursentu 13.5 kompostu husi Komprimisu $157.705,25, Obrigasaun $59.489,00, atuál $1.578,889,23 no saldu hamutuk $10.650,663,52.
Jornalista: Natalino Belo
Editór: Xisto Freitas da Piedade
