BAUKAU, 08 Abríl 2025 (TATOLI) —Autóridade Administrasaun Munisipál (AAM) Baukau anúnsia ona bá públiku atu submete dokumentu relasiona ho projetu Programa Dezenvolvimentu Integradu Munisipál (PDIM) tinan 2025.
Sekretáriu Munisipál Asuntu Administrasaun no Finansa, Juvinal Daniel Filipe Belo, esplika projetu PDIM tinan ne’e hamutuk ualu anúnsia ona ba públiku iha kuadru avizu AAM no kompañia sira-ne’ebé iha interese bele submete dokumentu antes halo selesaun tuir rekezitu ne’ebé estabelesidu.
“Emprezáriu balun sosa ona dokumentu, maibé tanba ita iha mudansa orsamentu BOQ (Bill of Quantities) hodi implika redusaun projetu rua,” Sekretáriu Munisipál Asuntu Administrasaun no Finansa Baukau informa ba TATOLI iha ninia kna’ar fatin Vila Nova, Baukau, tersa ne’e.
Juvinal Belo salienta PDIM tinan ne’e tuir loloos hamutuk 10 maibé redús rua nune’e hela projetu ualu tanba rua ne’ebé kanseladu mak konstrusaun ba saúde ne’ebé implika ba orsamentu hafoin halo mudansa ba BoQ.
Projetu ualu ne’ebé atuál anúnsia sai kompostu husi konstrusaun Postu Saúde Libagua, Postu Saúde Lelalai, konstrusaun rezidénsia pesóal saúde Osokeli, konstrusaun rezidénsia pesóal saúde Afasá, reabilitasaun edifísiu Eskola Bázika Filiál (EBF) Sorugua, Samalari (Laga) no konstrusaun edifísiu EBF Uai-kolo, Abafala, postu administrativu Kelikai Antiga.
Aleinde ne’e, AAM Baukau sei halo inspesaun ba PDIM tinan 2024 ne’ebé reaprópria ba tinan ne’e tanba kompañia responsável sira presiza kumpri rekizitu balun antes halo pagamantu ikus pursentu 10.
PDIM tinan 2024 hamutuk projetu lima kompostu husi edifísiu Postu Administrativu Kelikai Antiga, Postu Matebian, Irrigasaun Uatamutu, konstrusaun Postu Saúde Age no edifísiu Rejistu Notariadu ho totál orsamentu hamutuk rihun $102.
“Bainhira projetu ramata seidauk bele pagamantu hotu, pursentu 10 tenke husik hela tanba sei inspesaun durante fulan-tolu. Kuandu iha failansu kompañia presiza hadi’a,” Juvinal Belo akresenta.
Entretantu, orsamentu ba PDIM kategoria iha Kapitál Dezenvolvementu seidauk ezekuta iha trimestrál dahuluk tanba aprovizionamentu sei halo inspesaun ba projetu reapropriasaun no projetu foun foin anúnsiu públiku ho total orsamentu hamutuk hotu $1.407,212.
Jornalista: Natalino Belo
Editór: Xisto Freitas da Piedade
