BAUKAU, 11 Abríl 2025 (TATOLI)—Konsellu Kombatente Libertasaun Nasionál (CCLN-sigla portugés) kontinua ezije ba Governu atu submete Proposta Alterasaun Lei númeru: 3/2006, kona-ba Estatutu Kombatente Libertasaun Nasionál.
Vise-Prezidente Konsellu Administrasaun Konsellu Kombatente Libertasaun Nasionál (CCLN-sigla portugés), Mário Nicolau Marito dos Reis, esplika razaun atu altera lei númeru: 3/2006 tanba iha artigu balun ne’ebé la rekoñese no valoriza partisipasaun kombatente ne’ebé hakerek iha Konstitusaun Repúblika Demokrátika Timor-Leste (K-RDTL).
“Ami haree katak ho lei ne’ebé iha halo ita-nia kombatente sira ladún kontente. Lei ne’e la fó direitu ba inan-aman maibé ba de’it fén no oan,” Vise-Prezidente Konsellu Administrasaun CCLN hateten iha sede CMCLN, Vila Antiga, Baukau, sesta ne’e.
Marito Reis rekomenda ba Governu liuhusi Ministériu Asuntu Kombatente Libertasaun Nasionál (MAKLN) bainhira halo aterasaun foku ba artigu sira-ne’ebé la afavór ba kombatente sira hanesan família husi mártrir sorteiu (joven) laiha direitu atu reprezenta simu subsídiu.
Aleinde ne’e, tuir nia, bele rezolve kazu falsifikasaun dokumentu ne’ebé konsideradu kontinua sai problema ne’ebé suspeitadu envolve husi oknum balun inklui bele rezolve kontestasaun veteranu sira-nian kona-ba dadus editál tinan-2009 ne’ebé sei iha faze reklamasaun.
“Ami ko’alia ona ho Ministru Asuntu Kombatente Libertasaun Nasionál atu lori fali aprezenta iha Konsellu Ministru nune’e bele kontinua ba Parlamentu Nasionál atu muda lei ne’e,” Marito Reis akresenta.
Entretantu, Parlamentu Nasionál (PN) antes ne’e aprova ona alterasaun datoluk lei númeru 3/2006, kona-ba Estatutu Kombatente ba Libertasaun Nasionál, ne’ebé aprezenta husi MAKLN liuhusi Proposta-lei numéru: 7/VI (1a) hodi altera artigu hamutuk 14.
Artigu 14 referida kompostu artigu 3, 10, 11, 12, 13, 15, 18, 27, 28, 35 no regova artigu 17 kona-ba Komisaun Omenajen hodi reajusta husi artigu 8, 15, 18, 31, 32 no hasai letra eis iha artigu 38.
Jornalista: Natalino Belo
Editór: Xisto Freitas da Piedade
