BAUKAU, 10 Abríl 2025 (TATOLI)—Komunidade hamutuk uma-kain 90-resin husi Suku Samalari, Postu Administrativu Baguia, Munisípiu Baukau, seidauk asesu liña eletrisidade.
Xefe Suku Samalari, Maria Lusia Agostinha da Silva, esplika eletrisidade iha suku referidu sei sai preokupasaun komunidade tanba aldeia haat seidauk asesu nune’e autoridade suku halo ona esforsu liuhosi proposta ba Eletrisidade Timor-Leste, Empreza Públika (EDTL,EP) hodi rezolve kona-ba asuntu ne’e.
“Ha’u husu EDTL bele karik halo levantamentu atubele fasilita ami halo proposta nune’e komunidade bele asesu eletrisidade,” Xefe Suku Samalari informa ba TATOLI, Baukau Vila, kinta ne’e.
Autoridade suku kontinua husu ba responsável EDTL,EP atu responde preokupasaun kona-ba eletrisidade nune’e komunidade iha suku referidu bele sente naroman no fasilita estudante sira estudu iha tempu kalan.
Aleinde ne’e, preokupasaun seluk, planu atu utiliza prepagu ne’ebé sei difikulta komunidade tanba maioria hela iha área izolada no difísil atu asesu pulsa eletrisidade.
Komunidade hirak ne’ebé seidauk asesu eletrisidade kompostu husi Aldeia Ira-Oso no Taubere purvolta besik uma-kain 50, enkuantu Darloi Leten no Darloi Kraik hamutuk 47.
Suku Samalari, Postu Administrativu Baguia, hamutuk aldeia haat kompostu Ira-Osso, Taubere, Daraloi Leten no Daraloi Kraik ho totál populasaun hamutuk 1.822 husi uma-kain 479.
Jornalista: Natalino Belo
Editór: Xisto Freitas da Piedade
