BAUKAU, 11 Abríl 2025 (TATOLI)—Sede Konsellu Munisipál Kombatente Libertasaun Nasionál (CMCLN-sigla portugés), reabilitadu ona hafoin durante fulan-sia tama iha prosesu reabilitasaun.
Vise-Prezidente Konsellu Administrasaun Konsellu Kombatente Libertasaun Nasionál, Mário Nicolau Marito dos Reis, esplika reabilitasaun sede referida nu’udár símbulu harii baze iha kada munisípiu hodi atende problema sira-ne’ebé veteranu hasoru hanesan rekoñesimentu, valoriza no subsídiu tuir lei haktuir.
“Ami haree katak nesesáriu atu harii hanesan hamahon hodi simu netik kombatente husi kada diresaun atu rona netik sira-nia difikuldade,” Vise Prezidente Konsellu Administrasaun CCLN hateten iha sede CMCLN, Vila Antiga, Baukau, sesta ne’e.
Marito Reis argumenta ho edifísiu foun bele ona iha espasu atu estrutura CMCLN Baukau kompostu Prezidente, Sekretáriu Jerál, Sekretáriu Ezekutivu hamutuk ho membru na’in-tolu hafásil hala’o papél liuliu halo atendimentu ba kombatente sira.
Prezidente CMCLN Baukau, Fernando Gusmão ‘Beredu’u’ hato’o agradese ba Governu liuhusi Ministériu Asuntu Kombatente Libertasaun Nasionál (MAKLN) tanba konsege responde preokupasaun hodi hadi’a edifísiu CMCLN Baukau nune’e iha espasu hodi halo atendimentu ba kombatente sira iha Baukau.
“Kontente tanba ami-nia uma prontu ona. Antes ne’e kloot no agora iha espasu atu halo atendimentu,” Beredu’u subliña.
Edifísiu CMCLN Baukau iha tempu koloniál Portugés utiliza nu’udár sede Polísia Militár (PM) no kontinua utiliza husi Indonézia nu’udár Komandu Militár Distritál 1628 (Kodim-sigla Indonézia) batallaun infantaria 315.
Aleinde ne’e, durante okupasaun Indonézia sai sentru dadur, interrogasaun, torturasaun no fatin ezekusaun ba gerilleiru timoroan sira-ne’ebé luta ba ukun rasik aan.
Entretantu, sede CMCLN Baukau lokaliza iha Vila Antiga, Postu Baukau Vila, ne’ebé reabilita husi kompañia Planalto, Lda ho tótal orsamentu hamutuk $92.833,19 kompostu orsamentu orijinál $87.620,82 no adisionál $5.221 ho durasaun serbisu fulan-sia.
Jornalista: Natalino Belo
Editór: Xisto Freitas da Piedade
