DILI, 14 Abríl 2025 (TATOLI) – Autoridade Portuária Timor-Leste, Institutu Públiku (APORTIL, I.P) rekolla, entre Janeiru no Abríl, reseita rihun $309.05 ba kofre Estadu.
Reseita sira ne’ebé rekolla ne’e maihusi atividade hanesan operasaun ró-ahi Berlin Ramelau, Nakroma, Success no fó aluga armazein APORTIL nian ba EDTL no seluk tan.
Vogál II APORTIL, Leandro de Sena, esplika katak reseita sira ne’ebé arrekada ne’e sei ki’ik, tanba Berlin Nakroma foin fila mai Dili iha fulan-Marsu 2025 hafoin halo manutensaun iha Surabaya iha Outubru 2024.
Nia afirma hafoin ró -hi Berlin Nakroma fila mai, APORTIL mós halo mudansa ba oráriu viajen regulár ba ró pasajeiru sira Dili-Oekusi no Dili-Ataúru nian.
Nia haktuir katak oráriu sira mak hanesan viajen ró Berlin Ramelau nian husi Dili bá Oekusi hahú husi tersa ho sesta no husi Oekusi mai Dili kuarta no sabadu ho kustu billete bá-mai $8.
Oráriu Berlin Nakroma nian husi Dili bá Ataúro iha sabadu no domingu, bá-mai ho kustu $4. Ró-ahi Star CRAFT bá-mai Dili-Ataúru iha kinta no sabadu ho kustu $10 no ba VIP $12.
Ró Success Dili-Ataúru iha tersa no sesta ho kustu bá-mai $5 no Dili-Oekusi iha kuarta no domingu no Oekusi-Dili kinta no segunda ho presu $10.
Lembra katak, iha tinan kotuk, APORTIL rekolla ona reseita hamutuk $1.192.207,76 ba kofre Estadu.
APORTIL foin ezekuta 13% husi OJE iha trimestre dahuluk
Iha trimestre dahuluk 2025, APORTIL foin ezekuta 13% ka ekivalente ba rihun $568-resin husi Orsamentu Jerál Estadu (OJE) alokadu hamutuk millaun $4-resin.
“Orsamentu ne’ebé ita ezekuta ba kategoria tolu de’it mak saláriu no vensimentu, bens no serbisu no kapitál menór. Entaun, orsamemtu ne’ebe ita ezekuta ona ne’e barak liu saláriu no vensimentu”, nia esplika.
Jornalista: Arminda Fonseca
Editora: Maria Auxiliadora
