BAUKAU, 14 Abríl 2025 (TATOLI)–Tinan ne’e, autoridade suku sei reabilita estrada rurál iha Kaikua, Postu Administrativu Vemasse, Munisípiu Baukau, liuhosi orsamentu Programa Nasionál Dezenvolvimentu Suku (PNDS).
Xefe Suku Kaikua, Anibal Hendrique da Costa, esplika desizaun ne’e autoridade suku foti bazeia ba reuniaun konsellu suku tanba hakarak rezolve uluk estrada nune’e fasilita movimentu transporte antes kontinua bá programa no atividade sosiál seluk.
“Ami nafatin kontinua atividade estrada, antes kontinua bá seluk nune’e bele susesu iha dezenvolvimentu ,” Xefe Suku Kaikua informa ba TATOLI iha arredór Administrasaun Munisipál Vila Nova, Baukau, segunda ne’e.
Nia salienta katak ne’e mós parte ida kontinua atividade regulár síklu VI tinan 2024 nian ne’ebé reabilita ona estrada metru 515 no tinan ne’e sei finaliza tan liuhosi atividade síklu VII ne’ebé sei benefísia aldeia rua.
Anibal esplika PNDS sei aloka orsamentu hamutuk rihun $40 ba atividade regulár ne’e maibé sei iha faze levantamentu dadus iha terrenu antes tama implementasaun iha meadu tinan ne’e ho tipu cor beton.
“Estrada ne’e sei fó benefísiu ba komunidade liuliu fasilita lori produtu bá merkadu,” nia subliña.
Autoridade suku Kaikua konsidera atividade PNDS fó benefísiu ba komunidade tanba konsellu suku hamutuk ho komunidade mak deside no iha kontinuasaun nune’e apoia ona dezenvolvimentu iha suku.
Suku Kaikua iha aldeia rua kompostu husi Aldeia Bahamori no Kaikua ho totál populasaun hamutuk 1.874 husi uma-kain 617.
Jornalista: Natalino Belo
Editór: Xisto Freitas da Piedade
