DILI, 15 Abríl 2025 (TATOLI) – Governu Konstitusionál da-sia liuhusi Sekretáriu Estadu Komunikasaun Sosiál (SEKOMS), Expedito Loro Dias Ximenes kontinua asina kontratu ho rádiu komunidade sira iha territóriu Timor laran tomak. No, husu atu kontinua prioriza eleva persentajen kobertura iha área agrikultura.
Sekretáriu Estadu Komunikasaun Sosiál, Expedito Loro Dias Ximenes, informa katak kada tinan Governu fó apoiu ba rádiu komunidade sira, rádiu komunidade sanulu resin-sia, ne’ebé namkari iha munisípiu sira hotu. No, iha tinan ida-ne’e, aumenta tan rádiu komunidade rua; ida iha Laklubar (Manatutu) no ida iha Balibo (Bobonaro).
“Kontratu ne’ebé iha ne’e ninia kuantidade ne’e tuir ida-idak ninia proposta, balun hetan $8.000 no balun hetan $6.000. Ida-ne’e transferénsia públiku no sira mak jere rasik” sekretáriu Estadu ne’e esplika ba jornalista sira iha salaun Maria Gorreti, Sekretariu Estadu Igualdade (SEI) Kaikoli, Dili, ohin.
Governante ne’e subliña katak SEKOMS kada tinan apoia rádiu komunidade sira tanba konsidera rádiu ne’e estabele hosi komunidade no nia serbisu mós ba komunidade.
“Tanba ne’e mak ohin ha’u husu ba jestór sira, atu sira-nia programa kobertura ne’e haree liu ba iha atividade agrikultór sira, juventude no mós veteranus nian iha postu, iha suku inklui mós iha aldeia sira. Se bele sira halo persentajen kobertura ne’e 60% ba atividade agrikultór sira no 40% ba atividade seremoniál sira”, nia apela.
Iha fatin hanesan, Diretór Nasionál Dezenvolvimentu Mídia (DNDM), Manuel de Fátima, informa, governu selebra asina kontratu mídia auditivu komunitária ne’e tanba enkontru avaliasaun halo ona iha semana kotuk, inklui regra no ezekusaun hotu informa ona ba sira.
“Ohin ne’e ita entrega osan ba sira para sira bele jere tuir ezekusaun ne’ebé sira mensiona ona. No, husu nafatin ba sira oinsá bele ezekuta regra tuir orden ne’ebé iha simu ona”, ezekutivu ne’e esplika.
Jestór rádiu komunidade Manufahi, Vasco da Costa Mendes, hateten, “Ho orsamentu apoiu sira ne’e, ajuda ami hodi sosa ekipamentu rádiu nian, apoiu kombustivél mós ba ekipa rádiu hodi ba halo kobertura iha área rurál sira liuliu kona-ba agrikultura no sosiedade ninia moris”.
Nia mós informa kona-ba atinjimentu ne’ebé la’o bazeia ba grella programa nian, liuliu notísia lokál ne’ebé relevante ho komunidade sira-nia atividade iha agrikultura, asuntu sosiál sira. “Ita kobre ona hodi transmiti ba audiénsia sira” nia hato’o.
Entretantu, totál rádiu komunidade iha territóriu hamutuk ruanulu resin-ida kompostu husi Rádiu komunidade lian matebian Baukau, Rádiu komunidade kafé Ermera, rádiu komunidade Atoni Lifau Oekusi, Rádiu komunidade lian proklamadór, Rádiu komunidade lian Manukoko Ataúru.
Rádiu komunidade mauloko Maubisse, Rádiu komunidade rai-husar Aileu, Lospalos vox populy, Rádiu komunidade Maliana, Rádiu komunidade iliwai Manatutu, rádiu komunidade tokodede Likisá.
No, Rádiu komunidade 1912 Same, Rádiu komunidade tatamailau Ainaru, Rádiu komunidade povu Vikeke, Rádiu komunidade kova taroman Suai, Rádiu komunidade Bukoli, Rádiu loriku lian, Rádiu difisiénsia Timor-Leste, Rádiu Komoro no Rádiu fronteira Balibo.
Jornalista: Alexandra da Costa
Editór: Rafael Ximenes de A. Belo
