KOVALIMA, 15 Abríl 2025 (TATOLI) – Konsellu Munisipál Kombatente Libertasaun Nasionál (CMCLN-sigla portugés), Munisípiu Kovalima husu veteranu sira atu presiza pasiénsia, iha ámbitu selebrasaun festa Páskoa.
Sekretáriu CMCLN, Kovalima, Joaquim Barros “Sikatlet”, dehan, selebra festa Páskoa, sarani sira, hahú Kuarta-feira sinza no kontinua tempu kuarezma, nune’e daudaun ne’e hela de’it ona loron ida sarani Katólika atu selebra festa Páskoa tanba ne’e veteranu presiza selebra Páskoa ho pasiénsia.
“Konsellu Munisipál hakarak hato’o mensajen ba veteranu sira relasiona ita selebra festa Páskoa presiza moris ho vida pasénsia tuir ita idaidak nia fiar ne’ebé iha. Lalika muda ita-nia fi’ar, mantein fiar hanesan hanesan sarani relijiaun Katólika”, Joaquim Barros “Sikatlet” hato’o mensajen ne’e ba jornalista sira, iha Tabakolot, ohin.
Notísia relevante:Paróku Suai husu sarani sira selebra Páskoa ho dame
Atu selebra páskoa nia fó hanoin ba veteranu sira atu partisipa másima misa hodi selebra páskoa hahú iha Kinta-feira santa, Sesta-feira santa, Sábadu alleluia to’o tama iha Domingu resureisaun.
Fó hanoin fali katak, Paskoa nu’udar pontu kulminasaun sakrifísiu Nai Jesus Kristu nian, terus, mate iha kruz no moris hias husi mate hodi kasu ita ema nia salan entre ita ema maksalak no sala entre ita ho Na’i Maromak.
Antes tama festa Páskoa, sarani sira jejun durante loron 40; labele han barak, la han na’an iha Kuarta no Sesta-feira santa, tempu halo peneténsia, karidade no mós hamoos salan no hafoun moris ho fi’ar ba Na’i Maromak.
Ho nune’e Sarani sira hahú tempu Kuarezma ho Kuarta-feira sinzas, Domingu ramos, Na’i Jesus Kristu tama iha Jeruzalem, tama ba semana Santa ne’ebé hahú Kinta-feira santa fase apóstlu ninia ain, Sesta adorasaun ba Kruz hodi relembra Jesus Kristu ninia sofrimentu no mate iha kruz, Sábadu Aleluia no Domingu resureisaun.
Selebrasaun páskoa la’ós atu festeza de’it, la’ós atu reza taka liman hodi husu ba Na’i Maromak atu pedua sala ne’ebé ita komete, la’ós de’it festa páskoa atu kontenti maibé konsege ultrapasa jejun iha 40 dias nia laran. Importánsia husi sentidu Páskoa ne’e rasik atu hafoun moris no hafoun fi’ar.
Jornalista: Celestina Teles
Editór: Rafael Ximenes de A. Belo
