OEKUSI, 16 Abríl 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Sekretária Rejionál ba Asuntu Agrikultura, kuarta ohin, rega ai-moruk adubu orgániku Ako’y Magsasakang Organiku (AMO, sigla Inglés) ba natar ektare 77,97 ho totál na’in-306 iha área Naktuka, suku Bene-Ufe, sub-rejiaun Nítibe.
Diretór Diresaun Rejionál Agrikultura, Amaro Efi, informa katak atividade rega adubu orgániku AMO ne’e, pedidu husi natar na’in-306 husu atu apoia rega ba natar ekatre 77,97, tanba kada tinan produsaun menus tanba hetan atakasaun husi peste lakataru.
“Ida-ne’e polítika Autoridade RAEOA nian, atu oinsá ita-bele promove adubu AMO, atu hasa’e produsaun agrikola liuliu iha Naktuka ninian, tanba adubu orgániku ne’e, nia funsaun bele sai hanesan adubu no sai mós pestisida atu hamate lakataru bainhira ataka plantasaun hare,” Amaro Efi, informa iha ámbitu lansamentu hala’oiha natar Biofi, Naktuka, ohin.
Hafoin implementa AMO polítika Sekretária Rejionál Agrikultura, mós aplika kedas kuda hare ho téknika no ba oin sei apoia tan ba agrikultór sira-ne’ebe presiza tanba estoke abudu orgániku sufisiente.
“Suku Bene-Ufe iha natar ektare 212, totál natar ne’ebé ami rejista, agora ita apoia uluk ektare 77 maibé ba oin karik, iha pedidu husi agrikultór sira, ita sei bele responde, tanba ne’e planu prioridade 2025 mak hakarak hasa’e produsaun agrikola iha Oekusi,” nia afirma.
Xisto Neno, nu’udar natar-na’in iha área Naktuka, senti orgullu no agradese ba Autoridade RAEOA tanba foin dahuluk hetan apoiu tekniku oinsa kuda hare ho forma liña no mós apoiu adubu Organiku AMO.
“Ami kontente, tanba inisíu ami kuda, husi parte tékniku agrikultura hanorin ami, oinsa kuda forma liña, tanba durante ne’e ami kuda konvensaionál ka manual de’it, maibé ohin loron husi Sekretária Rejionál Agrikultura mós lori apoiu adubu organiku AMO hodi rega ba natar, tanba dehan katak atu hamate ulár oan sira, ne’ebé ami espera katak ho apoia ida-ne’e, bele tulun ami atu hasa’e produsaun haree nian iha tinan ne’e,”nia orgullu.
Antes ne’e, Sekretária Rejionál Agrikultura konsege sosa Adubu Ako’y Magsasakang Organiku (AMO) hamutuk pakote rihun 27 ho valor orsamentu rihun $600, ne’ebé fornese husi empreza JJEA AGRIVENTURES.CO husi nasaun Filipana atu utiliza ba natar no toos rai maran.
Notísia relevante:Autoridade RAEOA sosa adubu orgániku AMO hodi hasa’e produsaun agríkola
Jornalista: Abílio Elo Nini
Editór: Florencio Miranda Ximenes
