DILI, 26 Abríl 2025 (TATOLI)-Sarani sira halibur malu iha Estátua Nossa Senhora Imaculada da Conceição Lesidere iha tuku 08h00 dadersán hodi hein halo komboiu ne’ebé akompaña husi karreta rua ne’ebé Papa Francisco sa’e bainhira mai vizita Timor-Leste iha Setembru tinan kotuk no lori ai-funan bá altár santu ne’ebé prepara ba misa loraik nian.
Tuir observasaun Tatoli iha terrenu, karreta rua ne’ebé Papa Francisco sa’e bainhira mai vizita Timor-Leste to’o Lecidere tuku 08h30 no halo komboiu bá Tasi Tolu iha tuku 09h45, ne’ebé akompaña ho reza tersu.
Iha komboiu ne’e partisipa husi Ministru Administrasaun Estatál, Tomás Cabral, parte igreja no sarani sira.
Hafoin to’o Tasi Tolu Karreta Papa nian para kedas iha altár oin no karreta sira ne’ebé tula ai-funan presta omenajen nian akompaña karreta Papa. Ai-funan sira ne’e sarani sira tau kedas iha altár Santu oin.
Iha prosisaun ne’e, tuir route sai husi Lesidere no pasa husi Nunsiatura Apostólika-Faról para minutu ida fó presta omenajen no kontinua prosisaun liuhusi Palásiu Prezidensiál-Aitarak-Laran, Fatuhada to’o Tasi Tolu.
Sarani Joana do Rego hateten nu’udar sarani katólika sente lakon tebes bibi-atan di’ak ida, liuliu hanoin fali nia vizita mai Timor-Leste no sente fuan-moras haree ninia domin ne’ebé fó ba Timor-Leste.
“Buat ne’ebé ha’u sempre hanoin mak husi Papa mak ninia simplisidade no liafuan motivasaun ne’ebé ha’u sempre hanoin kona mak nia hanorin ita oinsá hadomi malu, perdua malu, labele hakanek malu”, Joana do Rego ba Tatoli iha Lesidere, ohin.
Nia agradese tebes tanba Governu hamutuk ho igreja bele realiza atividade komboiu ida-ne’e. Sira-nia prezensa iha Lesidere to’o tuku 08h00 dadersán tanba halo prosisaun husi Balide to’o Lesidere.
“Maske ita-nia prezensa la to’o Vatikanu maibé liuhusi atividade ida-ne’e ita hamutuk hasa’e orasaun sente ita iha hotu ona iha Vatikanu”, nia hateten
Iha fatin hanesan, sarani Paulina Bento hateten dezde rona Papa nia mate sempre hasa’e orasaun atu Maromak haraik fatin naroman ba nia.
“Ha’u sempre hasa’e orasaun ba nia atu Maromak haraik fatin di’ak ba nia hodi tau-matan mai ita, tanba hanoin fali nia vizita mai Timor-Leste hanorin ita oinsá ita hadomi malu, liuliu nia dehan ha’u-nia fuan monu ba Timor-Leste”, nia hateten.
Tuir observasaun, dadersán ne’e kontroladu tanba hetan seguransa másima husi Polísia Nasionál Timor-Leste.
Jornalista: Armimda Fonseca
Editora: Maria Auxiliadora
