DILI, 29 Abríl 2025 (TATOLI)–Prezidente Repúblika (PR), José Ramos Horta, tersa ne’e, nomea Juíz Afonso Carmona husi Tribunál Judisiál Primeira Instánsia Dili hodi substitui atuál Prezidente Tribunál Rekursu, Deolindo dos Santos, ba mandatu tinan haat.
Xefe Estadu José Ramos Horta nomea juíz ne’e bazeia ba Dekretu Prezidente ho númeru 35/2025 ne’ebé públika iha Jornál Repúblika, 29 Abríl 2025.
Prezidente Tribunal Rekursu nomeadu seidauk bele pronúnsia buat ruma kona-ba nia nomeasaun ne’e.
“Sim, iha ona nomeasaun duni. Maibé, agora ha’u seidauk bele ko’alia buat ita tanba orsida ha’u pose tiha mak ha’u foin ko’alia kona-ba saida mak ha’u atu ko’alia,” Afonso Carmona hateten ba Tatoli via telefónema.
Tuir ajenda katak Juíz Afonso Carmona sei simu pose husi Prezidente Repúblika iha tersa ohin tuku haat loraik, iha Palásiu Prezidente, Bairro Pité.
Rekorda fali katak Juíz Afonso Carmona molok ne’e asumi kargu nu’udar Juíz Administradór Tribunál Primeira Instánsia Dili ba mandatu tinan haat, 2019-2023
Jornalista: Natalino Costa
Editór: Xisto Freitas da Piedade
