Reuniaun ASPA Postu Matebian aprova programa prioridade tolu
BAUKAU, 28 Abríl 2025 (TATOLI) —Autoridade Postu Administrativu Matebian liuhosi reuniaun Asembleia Postu Administrativu (ASPA) aprova programa prioridade tolu ba tinan 2026.
Administradór Postu Administrativu Matebian, Munisípiu Baukau, Domingos Pereira, esplika objetivu reuniaun ASPA atu delibera no halo aprovasaun ba programa sira-ne’ebé aprezenta husi kada suku bazeia ba orientasaun tuir despaxu husi Ministériu Administrasaun Estatál (MAE) númeru 02/M-MAE/1/2025 kona-ba identifikasaun nesesidade prioridade tuir Programa Dezenvolvimentu Integradu Munisipál (PDIM) ba tinan 2026.
“Postu Matebian iha projetu tolu mak ami haruka mai PDIM, kompostu husi bee-moos, konstrusaun moru protesaun ba Sede Suku Laisorulai de baixo no estrada ba edifísiu Postu Matebian nian,” Administradór Postu Matebian hateten iha edifísiu Administrasaun Munisipál Baukau, Vila Nova, segunda ne’e.
Domingos Pereira salienta, programa bee-moos tuir planu sei kanaliza liña bee husi bee-matan Dauaduka, Suku Lelalai ne’ebé sei benefísia uma-kain hamutuk 8.527 iha suku lima kompostu husi Lelalai, Laisorulai de Baixo, Laisorulai de Cima, Maluru no Abo.
Aleinde ne’e, programa konstrusaun moru protesaun ba sSde Suku Laisorulai de Baixo no hadi’a estrada ba edifísiu Postu Matebian ho totál metru 600, ne’ebé konsideradu estragu no difikulta movimentu transporte.
“Ekipa PDIM sei tun ba terenu, tanba proposta ne’e ba tinan 2026 nian,” Domingos Pereira informa.
Programa prioridade ne’ebé Postu Matebian aprezenta sei hetan aprovasaun iha reuniaun rua hanesan Konsellu Koordenasaun Munisipál no Konsellu Konsultivu Munisipál antes ajusta iha Planu Asaun Anuál (PAA) no sei diskute iha Komisaun Revizaun Orsamentál (KRO) antes hetan aprovasaun liuhosi debate iha Parlamentu Nasionál.
Entretantu, Postu Administrativu Matebian kompostu husi Suku Laisorulai de cima, Laisorulai de Baixo, Lelalai, Maluru no Abo ho totál populasaun hamutuk 10.420 husi uma-kain 2.534.
Jornalista: Natalino Belo
Editór: Xisto Freitas da Piedade
