Governu aprova regra preferensiál akordu komérsiu livre
DILI, 30 Abríl 2025 (TATOLI)—Governu liuhusi reuniaun Konsellu Ministru iha Palásiu Governu Dili, kuarta ne’e, aprova projetu Dekretu Governu ne’ebé aprezenta husi Ministru Komérsiu no Indústria, Filipus Nino Pereira, ne’ebé estabelese prosedimentu ne’ebé aplikavél ba regra preferensiál sira iha ámbitu akordu komérsiu livre no akordu komersiál sira-seluk.
“Objetivu husi Dekretu Governu ida-ne’e mak atu promove no fasilita esportasaun no importasaun sasán no komérsiu entre Timor-Leste ho ninia parseiru komersiál estratéjiku sira, nune’e mós atu prevene fraude kona-ba sasán nia orijen,” refere iha nota ne’ebé Agência Tatoli asesu, ohin.
Iha sentidu, diploma ida-ne’e define prosedimentu ba emisaun sertifikadu orijen nian, ne’ebé estabelese regra, matadalan no prosesu avaliasaun sira-ne’ebé aplikavél hodi determina orijen husi sasán esportadu no importadu sira-ne’ebé hetan benefísiu hosi preferénsia pautai, hodi konsidera rekezitu sira-ne’ebé mai husi akordu sira-ne’ebé temi ona.
Aleinde ne’e, entre matéria sira seluk, diploma ida-ne’e define responsabilidade husi autoridade kompetente sira iha ámbitu husi regra orijen nian, liuliu iha ezerse funsaun emisaun, sertifikasaun, inspesaun, verifikasaun no resesaun prova orijen nian, no mós obrigasaun hosi importadór, produtór no esportadór sertifikadu sira, tuir akordu sira-ne’ebé temi ona.
Jornalista : Hortencio Sanchez
Editór : Cancio Ximenes
