BAUKAU, 30 Abríl 2025 (TATOLI)—Sekretaria Estadu Formasaun Profisionál no Empregu (SEFOPE) Munisípiu Baukau kontinua disemina Lei Traballu ba komunidade hodi solusiona kazu disputa traballadór ne’ebé akontese iha Munisípiu Baukau.
Diretór SEFOPE Munisípiu Baukau, Romualdo de Sousa, esplika nu’udár instituisaun iha munisípiu nafatin kumpri oreintasaun husi nasionál hodi implementa polítika liuliu rona no buka solusaun ba kazu disputa traballadór no kontinua sosializa Lei Traballu ba komunidade iha postu liuliu ba kompañia no traballadór.
“SEFOPE kontinua loke odamatan ba kualker kazu relasiona ho traballadór. Ita kontinua esforsu atu rezolve liuliu problema ne’ebé mosu iha serbisu fatin,” Diretór SEFOPE Baukau hato’o mesajen ba TATOLI relasiona ho Loron Mundiál Traballadór iha ninia kna’ar fatin, Vila Nova, Baukau, kuarta ne’e.
Notísia relevante: SEFOPE prepara Ezbosu Lei Traballadór Doméstiku
Romualdo Sousa argumenta, atividade sensibilizasaun hala’o iha kada trimestrál ne’ebé alvu komunidade, autoridade postu inklui suku liuliu traballadór no emprezáriu ne’ebé eziste iha Baukau, ho objetivu atu entidade sira iha koñesimentu kona-ba regulamentu sira-ne’ebé eziste iha Timor-Leste.
Nia konsidera liuhosi diseminasaun Lei númeru: 4/2012, loron 21 Fevereiru, kona-ba Lei Traballu, foku liubá direitu no devér traballadór no emprezáriu ajuda ona hamenus kazu disputa traballadór iha Baukau.
Romualdo Sousa kontinua husu ba traballadór sira serbisu ho disiplina liuliu hatudu prestasaun no kumpri oras nune’e evita mosu dezentendimentu iha serbisu fatin.
Aleinde ne’e, husu kompañia sira atu trata traballadór ho dignu liuliu kumpri devér selu direitu traballadór tuir tempu tanba traballadór nu’udár umana ne’ebé interligadu ho kompañia.
“Parte rua, kompañia ho traballadór, liga ba malu. Ne’e hatuur iha Lei Traballu hanesan direitu no devér, kuandu kumpri kazu disputa sei la akontese,” Romualdo Sousa akresenta.
Tuir dadus, SEFOPE Munisípiu Baukau durante tinan 2025 rejista kazu disputa traballadór hamutuk na’in-20 ne’ebé envolve husi kompañia neen kompostu lokál lima no internasionál ida.
Husi númeru 20 referidu, kompañia haat mak konsege rezolve traballadór na’in-haat liuhosi dalan internál ho mediasaun ne’ebé rezulta kompañia sira halo indemnizasaun ba traballadór ho orsamentu rihun $ 5.504.
Jornalista: Natalino Belo
Editór: Xisto Freitas da Piedade
