DILI, 02 Maiu 2025 (TATOLI)—Ministru Juventude Desportu Arte no Kultura (MJDAK), Nelyo Isaac Sarmento, hateten atleta ne’ebé prepara ba jogu SEA Games Tailándia tinan 2025 sei konsentra hamutuk iha sentru treinamentu hahú fulan-jullu antes dezloka ba tuir kompetisaun rejionál ne’e.
Notísia Relevante: MJDAK-Federasaun desportiva ualu diskute prepararivu ba jogu CPLP
“Kona-ba jogu SEA Games atleta sira sei konsentra hamutuk iha sentru treinamentu ne’e hahú fulan-Jullu, soke malu uitoan ho jogu CPLP maibé agora ita ko’alia uluk jogu CPLP nian,” Ministru Nelyo hateten ba jornalista sira iha edifisiu MJDAK Lecidere, Dili, sesta ne’e.
Ministru ne’e dehan, kona-ba jogu SEA Games federasaun sira informadu ona no daudaun ne’e balun prepara hela sira-nia atelta tuir modalidade ida-idak nian.
“Governu agora fó oportunidade ba desportu ne’ebé iha prestasaun di’ak, hanesan modalidade sira-ne’ebé prestasaun di’ak ami apoiu para ba kompete iha eventu internasionál sira,” Nelyo tenik.
Nia esplika, modalidade ne’ebé durante ne’e Governu akompaña hatudu prestasaun di’ak no rejistu atu kompete iha SEA Games tinan ne’e mak Atletizmu, Boxe, Futeból, Karate-do no Taekwondo.
“Nune’e mak iha tempu besik ita sei tur hamutuk ho Komite Olimpíku Nasionál Timor-Leste, Konfederasaun Desportiva Timor-Leste atu diskute atu bele hetan hanoin ida de’it, atu fó apoiu másimu ba modalidade sira-ne’ebé atu ba kompete iha jogu SEA Games, maibé Governu nia haree modalidade lima mak iha prestasaun atu ba kompete jogu SEA Games,” nia dehan.
Kona-ba orsamentu, Governante ne’e afirma, prepara ona kondisaun hotu atu nune’e Timor-Leste tenke kompete iha jogu SEA Games tinan ne’e.
“Ita iha ona orsamentu, nia montante ha’u seidauk bele fó sai maibé jogu CPLP remata ha’u bele fó sai montante osan hira ita prepara ba jogu ne’e,” nia dehan.
Notísia Relevante: MJDAK-Telkomsel asina akordu kooperasaun ba jogu CPLP
Jornalista : Hortencio Sanchez
Editór : Cancio Ximenes
