DILI, 25 Abríl 2025 (TATOLI)—Governu Timor-Leste liuhosi Ministériu Juventude, Desportu, Arte no Kultura (MJDAK), asina Nota Entendimentu (MoU) ba kooperasaun ho Telkomsel Timor-Leste nu’udar patrosinadór prinsipál ba jogu internasionál CPLP ba da-12 ne’ebé sei realiza iha Timor-Leste iha fulan-Jullu mai ne’e.
Notísia Relevante: MJDAK-Telkomsel diskute kooperasaun servisu realiza jogu CPLP iha TL
Akordu kooperasaun ne’e asina husi Ministru Juventude, Desportu, Arte, no Kultura Nelyo Isaac Sarmento no CEO Telekomunikasaun Internasionál Indonézia, Benedictus Ardiyan Priyo.
“Asinatura MoU ho Telkomsel nu’udar patrosinadór prinsipál ba jogu XII CPLP iha fulan hirak tuir mai ne’e, Telkomsel sei apoia atividade hotu-hotu ne’ebé relasiona ho jogu CPLP no mós fó apoiu ba komisaun organizadora jogu CPLP nian iha promosaun inklui fasilidade oioin. Hanesan, materiál ba partisipante CPLP ne’ebé partisipa no mós ba voluntáriu sira-ne’ebé sei servisu iha fasilitasaun no mós apoiu tékniku ba jogu CPLP nian komisaun iha rejistu partisipante CPLP ne’ebé sei partisipa iha jogu CPLP,” Nelyo hateten ba jornalista sira iha Otél Palm Spring, Fatuhada, ohin.
Nu’udar parseiru ofisiál, Telkomsel sei prodús materiál prinsipál sira-ne’ebé sei fahe ba delegadu no atleta sira husi nasaun neen, inklui fornese kartaun SIM gratuita kompletu ho internet iha loron eventu nian ba kontijente sira, inklui komisaun organizadora no voluntáriu sira, inklui rejistu online husi delegadu sira hosi nasaun neen.
Maske Telkomsel nu’udár patrosinadór prinsipál maibé Governu nakloke nafatin ba partidu privadu no indústria sira-ne’ebé hakarak sai parseiru iha kompetisaun refere.
Entretantu, CEO Telkomcel Benedictus Ardiyanto Priyo hateten, kolaborasaun ne’e nu’udar pilar importante ida ba Telkomsel atu hametin kolaborasaun entre setór, enkoraja inovasaun lokál, dezenvolve potensiál juventude, no prezerva no promove patrimóniu kulturál Timor-Leste nian iha nível mundiál ho Governu Timor-Leste.
“Kolaborasaun ne’e hanesan manifestasaun loloos ida husi kompromisu Telkomsel nian hodi enkoraja inovasaun no konstrui futuru juventude Timor-Leste nian liuhusi hasa’e konetividade dijitál hodi la haluha sira-nia abut kulturál no identidade nasionál,” Benedictus Ardiyanto Priyo hateten.
Iha fatin hanesan, Embaixadór Indonézia iha Timor-Leste, Okto Dorinus Manik hato’o agradesimentu ba Governu Timor-Leste, liu-iu MJDAK ne’ebé fó konfiansa ba Telkomcel nu’udar empreza públika Indonézia hodi sai patrosinadór prinsipál ba Olimpíada CPLP 2025.
Serimónia asinatura ne’e hetan partisipasaun husi Sekretáriu Estadu Arte no Kultura, Jorge Soares Cristovao, no Xefe Misaun Timor-Leste ba XII Jogu CPLP 2025, Joao Rodrigues, atuál Diretór Jerál Desportu iha MJDAK, nune’e mós entidade balun husi MJDAK no Telkom.
Jornalista : Hortencio Sanchez
Editór : Cancio Ximenes
