DILI, 02 Maiu 2025 (TATOLI) – Institutu Públiku Imprensa Nasionál Timor-Leste (INTL, I.P) asina termu aseitasaun no kontratu ho funsionáriu selesionadu kazuál na’in-hitu ne’ebé rekruta iha tinan-2025 ba área lima.
Prezidente INTL, I.P, Jaime Correia, informa katak selebrasaun asinatura termu aseitasaun no kontratu ne’e bazea ba nesesidade imprensa nasionál nian.
“Hansan ohin ita boot sira haree iha ema nain hitu mak selesionadu ba iha área sira hanesan tékniku profesionál ba iha área IT, ida ba iha eletrisidade, ida ba kontabilidade i depois iha na’in rua ba iha asistente tékniku, sira atu ajuda mákina imprensaun no iha na’in rua motorista”, Prezidente ne’e informa ba jornalista TATOLI, iha edifísiu INTL, I.P, Kolmera Dili, ohin.
“Tanba ita presiza motorista atu bele ajuda atividade sira iha ne’e, entaun durante semana ida ami-nia ekipa júri halo teste ba sira no iha na’in hira ne’e mak hetan rezultadu di’ak liu, ne’ebé ohin sira simu termu aseitasaun no asina kontratu,” autoridade másima INTL ne’e reforsa.
Kona-ba prosesu loke konkursu, Prezidente INTL, I.P, Jaime Correia haktuir, “Ita hahú hotu iha fulan ida-ne’e. Fofoun ita fó sai avizu iha mídia sosiál, hafoin kandidatu sira-ne’e mai hatama sira-nia dokumentu, hafoin ne’e mak ita marka loron hodi entrevista”.
“Entaun iha prosesu entrevista, sei iha mós prátika, liuliu ba sira iha área operasaun mákina ninian, aleinde ne’e kona-ba kontratu sira-nee durasaun tinan ida tanba ita haree ba ita-nia orsamentu jerál Estadu. Maibé, iha posibilidade tinan oin ita kontinua, fó oportunidade ba sira hotu liuhusi avaliasaun, ita sei halo avaliasaun servisu, sira servisu ho di’ak buat hotu hotu di’ak konserteza ita sei kontinua sira-nia kontratu ba tinan oin”, nia aumenta.
Prezidente INTL, I.P, iha okaziaun ne’e, kongratula mós funsionáriu rekrutadu sira ne’e.
“Parabéns ba imi, tanba selesionadu. Signifika, imi di’ak liu kandidatu sira seluk, no espera ita-boot sira bele servisu hamutuk ho ami hodi lori empreza nasionál ne di’ak liután ba faturu no motorista sira mós hanesan ita husu para tenke iha karta kondusaun; tenke iha buat sira nee hotu”.
Iha fatin hanesan, funsionáriu selesionadu husi área tékniku IT, Miguel Amaral de Araújo, apresia ho rezultadu ne’e no kompromete utiliza nia kompeténsia IT ne’ebé iha hodi kontribui.
“Nune’e ha’u-nia esperansa ba oin ne’e, atu dezenvolve di’ak liután rede iha instituisaun INTL,I.P nian liuliu iha área teknolójia nian hodi servisu hamutuk apoiu administrasaun, finansa nian nune’e bele atinji tarjetu (alvu), tuir misaun ne’ebé iha”, funsionáriu ne’e espera.
Nia hatutan, “Tanba durasaun kontratu tinan ida de’it, entaun ha’u sei esforsu oinsá bele kontinua fali ba iha périodu tuirmai. Ha’u sei halo servisu ne’ebé di’ak, no hatudu komportamentu ne’ebé di’ak, hatais disiplinadu, pontualidade no tenke iha responsabilidade; ida-ne’e importante liu para kontribui”.
Entretantu, funsionáriu kazuál sira-ne’e konklui ba servisu nasionál iha área lima no iha ninia kategória profisionál grau rua, hanesan; tékniku eletrisidade ho grau C, ema na’in ida, tékniku IT ho grau C, ema na’in ida, tékniku kontabilidade ho grau C, ema na’in ida, tékniku operadór mákina ho grau E, ema na’in rua no motorista operasionál ho grau E, ema na’in rua.
Jornalista: Alexandra da Costa
Editór: Rafael Ximenes de A. Belo
