DILI, 05 Maiu 2025 (TATOLI)—Prezidente Komisaun Promosaun Diviza Tranzitória Polísia Nasionál Timor-Leste (PNTL), Paulo de Assis Belo, hateten Ministériu Interiór (MI) sei solisita Konsellu Ministru atu Komandu PNTL bele halo promosaun ba Ofisiál Superiór husi postu Superintendente Asistente Polísia to’o Superintendente Xefe Polísia.
“Ita hotu akompaña katak Governu halo ona Promosaun Diviza Trazitória ba membru polísia husi diviza Ajente to’o Inspetór. Sira hamutuk 2.747 ita halo tiha ona. Faze tuirmai mak ami agora prepara hela pedidu ida para submete bá Ministru Interiór lori bá Konsellu Ministru hodi hetan autorizasaun para halo mós Promosaun Ofisiál Superiór ba membru PNTL sira-ne’ebé mak agora iha hela ne’e,” Paulo hateten ba jornalista sira hafoin partisipa serimónia Promosaun Diviza Tranzitória ba membru PNTL 400-resin husi Komandu Jerál PNTL ne’ebé hala’o iha Kuartél Jerál PNTL, Kaikoli, segunda ne’e.
Nia dehan, promosaun ne’e labele to’o de’it sira ajente no inspetór, maibé mós ba sira-ne’ebé ho Superintendente Asistente to’o Superintendente Xefe.
“Depoizde promosaun tranzitória, faze tuirmai mak ha’u hanoin Komandu PNTL tenke halo promosaun mós ba Ofisiál Superiór sira. Tuir Estatutu Pesoál PNTL katak depoizde Promosaun Tranzitória Diviza ba Ajente to’o Inspetór ne’e, Ministériu Interiór sei halo pedidu autorizasaun ba Konsellu Ministru hodi fó biban ba Komandu PNTL halo promosaun ba ofisiál no superiór sira,” nia informa.
Paulo Assis esplika membru PNTL ne’ebé agora iha diviza Superintendente Asistente bele promove ba Superintendente Polísia no Superintendente Polísia bele promovidu bá Superintendente Xefe Polísia.
“Sira-ne’e sei promovidu iha tinan ida-ne’e tanba ita kuandu halo promosaun ba Ajente Polísia to’o Inspetór Xefe inklui husi Inspetór Xefe Polísia ba Superintendente Asistente, entaun sira ida Superintendente mós iha direitu tenke hetan promosaun,” nia tenik.
Paulo informa katak membru PNTL ho diviza Superintendente Xefe iha ema na’in-17, na’in-neen tama ona idade reforma no agora polísia ho diviza Superintendente Xefe ne’e iha de’it na’in-11.
“Ba diviza Superintendente ne’e agora iha ema na’in-23, enkuantu ba diviza ho Superintendente Asistente ne’e iha 24, maibé ida mate no agora iha de’it na’in-23,” nia konklui.
Jornalista: Natalino Costa
Editór: Xisto Freitas da Piedade
