DILI, 06 Maiu 2025 (TATOLI) – Banku Sentrál Timor-Leste (BCTL, sigla portugés) simu ona pedidu ida husi Konsellu Kombatente Libertasaun Nasionál atu harii banku ida ho naran Banco do Nosso Futuro ka Banku ba Ita-nia Futuru.
Governadór BCTL, Hélder Lopes, esplika katak Banku Sentrál simu pedidu iha tinan kotuk atu harii Banco do Nosso Futuro husi Fundu Veteranu, maibé la’ós estabelese Banku Veteranu.
“Depoizde halo avaliasaun ba pedidu aplikasaun iha tinan kotuk haree katak kumpre rekizitu hotu tuir lei, nune’e iha Dezembru tinan kotuk Konsellu Administrasaun Banku Sentrál fó ona lisensa temporária ba Banco do Nosso Futuro durante tinan ida atu prepara sira-nia aan, hodi prienxe rekizitu ne’ebé BCTL fó ba sira atu estabelese”, Hélder Lopes hateten iha Akait, ohin.
Tuir nia, bainhira sira prienxe rekizitu hotu ba estabelesimentu banku nian maka Banku Sentrál sei fó lisensa definitiva ba sira atu halo operasaun no daudaun Banku ba Ita-nia Futuru ne’e iha hela prosesu preprativu.
Rekizitu ne’ebé BCTL fó lubuk ida, liuliu tenke iha fatin, iha ema kompetene hodi bele hala’o banku ida-ne’e, sistema bankária tenke entrega mai sistema bankária BCTL nian no seluk tan. “Sira tenke prienxe hodi funsiona hanesan banku kuandu ami fó lisensa definitiva ba sira, sira hahú serve kliente nu’udar banku loloos”, hateten.
Antes ne’e, Diretór Nasionál Pensaun no Subvensaun, Manuel dos Santos Araújo, hateten dezde kriasaun Fundu Kontribuitivu Kombatente Libetasaun Nasionál atinje ona millaun $48.98, ne’ebé la inklui lukru.
Prezidente Konsellu Kombatente Libertasaun Nasionál, Vidal de Jesus Riak Leman, hateten Fundu Kontribuitivu ne’e planeia atu harii banku hodi fó kréditu ba veteranu sira.
Notísia relevante: https://tatoli.tl/2024/10/23/fundu-kontributivu-kombatente-libertasaun-aumenta-ona-ba-millaun-50-resin/
Jornalista: Arminda Fonseca
Editora: Maria Auxiliadora
