DILI, 06 Maiu 2025 (TATOLI)—Prezidente Repúblika, José Ramos Horta, hasoru malu ho Sekretáriu Jerál organizasaun intergovernamentál g7+, Helder da Costa, hodi hala’o enkontru no Xefe Estadu konfirma simu kna’ar foun nu’udár Enviadu Espesiál g7+ ba Mediasaun Konflitu Mundiál.
Sekretáriu Jerál organizasaun intergovernamentál g7+, Helder da Costa, formalmente hato’o agradesementu ba Prezidente Horta ninia lideransa durante Reuniaun Ministeriál g7+ foin lalais ne’e no aprezenta Rezolusaun Dili, ne’ebé kontein pontu prinsipál hitu (7) inklui dezignasaun Prezidente Ramos Horta nu’udar Enviadu Espesiál.
Prezidente konfirma nia disponibilidade ba knaar diplomátiku ida-ne’e no esperansa prontidaun atu hahú rezolve konflitu sira-ne’ebé la’o hela iha mundu tomak.
Diskusaun sira kobre mós kona-ba influénsia globál ne’ebé aumenta husi g7+ nia lian, ho Helder da Costa informa Prezidente Ramos Horta kona-ba enkontru ida-ne’ebé sei mai ho Sekretáriu Jerál ASEAN nian ne’ebé marka ona ba loron 19 fulan-Maiu iha Jakarta.
“Enkontru, ida-ne’e iha signifikadu partikulár tanba Timor-Leste nia prosesu adezaun ba ASEAN ne’ebé la’o daudaun,” refere nota ne’ebé Tatoli asesu husi media Palásiu Prezidensiál, ohin.
Prezidente Ramos Horta reafirma ninia apoiu kontinuadu ba g7+ no ninia misaun atu amplifika lian husi Estadu frajil no afetadu husi konflitu iha fórum internasionál sira.
Prezidente espresa nia onra hodi simu kna’ar Enviadu Espesiál nian, hodi nota katak Prezidente nia esperiénsia ho rezolusaun konflitu no harii dame sei orienta nia aproximasaun ba pozisaun diplomátika importante ida-ne’e.
TATOLI
