DILI, 06 Maiu 2025 (TATOLI) – Primeiru-Ministru (PM), Kay Rala Xanana Gusmão, felisita nia omólogu Repúblika Sosialista Vietname, Pham Minh Chinh, iha okaziaun Aniversáriu Libertasaun Súl no Loron Reunifikasaun Nasionál ba da-50.
Iha karta ne’ebé haruka iha loron 30 fulan-Abríl, xefe Ezekutivu lori Governu no povu Timor-Leste nia naran hato’o parabéns ba Repúblika Sosialista Vietname iha okaziaun istóriku ida-ne’e.
Xanana Gusmão subliña katak “marku ida-ne’e nu’udar momentu orgullu nasionál ida ne’ebé kle’an ba Vietname no hanesan testemuñu korajen, reziliénsia no determinasaun nian ida ne’ebé estraordináriu husi povu vietnamita iha sira-nia esforsu atu hetan independénsia, unidade no dame”.
“Vietname nia reunifikasaun tau ona baze ba progresu, dezenvolvimentu no lideransa internasionál ne’ebé estraordináriu”, xefe Governu hateten iha nota ne’ebé Tatoli asesu.
Primeiru-Ministru destaka mós “relasaun konfiansa no amizade ne’ebé metin” entre Timor-Leste no Vietname, hodi valoriza “lasu solidariedade ne’ebé harii entre nasaun rua ne’e” no espresa Governu Timor-Leste nia hakarak “hodi hametin kooperasaun ne’e iha futuru”.
Hodi marka “aniversáriu markante ida-ne’e”, Xanana Gusmão reafirma “amizade no apoiu kontínuu Timor-Leste nian” no hato’o esperansa atu “kontinua serbisu hamutuk hodi promove dame, dezenvolvimentu no prosperidade iha ita-nia rejiaun no liután”.
TATOLI
