DILI, 07 Maiu 2025 (TATOLI)-Ministru Komérsiu Indústria (MKI), Nino Filipus Perreira, hateten proposta-lei númeru 10/VI(1a)-Rejime Jurídiku Garantia Mobiliáriu operadór ekonómiku no setór privadu asesu kréditu iha banku.
“Benefísia prinsipál proposta-lei dahuluk mak fasilita asesu kréditu hodi bele uza ekipamentu, ai-horis, karreta uza sai hanesan garantia, ida ne’e mós hametin investimentu hodi fó seguransa jurídiku boot liu ba kreadór no investidór nasionál no internasionál”, Governante ne’e hato’o iha diskusaun espesialidade loron dahuluk ba proposta-lei referidu ne’ebé hala’o husi Komisaun A iha Parlamentu Nasionál ne’ebé trata asuntu Justisa no Konstituisionál iha Maubara, Likisa, kuarta ne’e.
Nia hateten lejislasaun ne’e mós moderniza no armoniza sistema Timor-Leste nian ho padraun internasionál.
“Bele hasa’e konfiansa no prezibilidade hamenus kustu no efisiensia ba sentralizadu no prosedimentu eletróniku iha impaktu sosiál ne’ebé pozitivu liuhusi benefísia agrikultór no ekonomia kiik sira, promove inkluzaun finanseira kontribui hamenus ki’ak”, akresenta.
Governante ne’e konsidera diskusaun espesialidade ne’e importante no esensiál ba konsentrasaun iha diskusaun klean hodi bele prodús lei ida garante duni atividade ekonómika justu, asesível ba ita-nia setór privadu sira.
“Inisiativa lejislativa ida ne’e ho objetivu moderniza ordenamentu jurídiku iha Timor-Leste nian ba área garantia mobiliáriu nian hodi promove ambiente ekonómika ida ne’ebé dinámiku, inkluzivu no efisiente liu”, tenik.
Nia dehan mekanizmu sira ne’ebé prevee iha kódiku sívil hanesan peñor rekere fó sasán ruma nu’udar garantia ne’ebé kria obstákulu operasionál sira prevene nafatin atu uza sasán ne’e husi devedór no halo netik asesu ba kréditu liliu ba empreza ki’ik no media sira.
“Rejime ida ne’e mós propoin sistema eletróniku no simplifikadu ba rejistu garantia ba beins no móvel laharee ba transmisaun materiál, nune’e haluan variedade ne’ebé bele uza hanesan garantia”, katak nia.
Iha fatin hanesan Prezidente Komisaun A, Patrocinio dos Reis Fernandes, dehan deputadu sira aprezenta proposta alterasaun hamutuk 32.
“Debate lei ho ema nia hanoin hodi hadi’a di’ak liutan lei ne’e hodi fasilita implementadór”, nia hato’o.
Enkuantu, proposta-lei ne’e iha artigu 81, nune’e deputadu sira sei deskute espéfiku kada artigu inklui proposta alterasaun sira.
Notísia relevante: PN aprova proposta-lei Garantia Mobiliáriu iha faze jeneralidade
Jornalista : Nelson de Sousa
Editora : Rita Almeida
