DILI, 08 Maiu 2025 (TATOLI)—Prezidente Repúblika José Ramos Horta parabeniza Chanceler Alemaña, Friedrich Merz, ne’ebé eleitu ba prezidente hafoin manán eleisaun iha loron 06 fulan-Maiu 2025 ne’e.
“Ha’u hakarak hato’o ba Ita-Boot, parabéns tanba Ita-Boot nia eleisaun, iha loron 06 fulan-Maiu 2025 nu’udar Cahnceler Repúblika Federál Alemaña nian. Ita-boot nia eleisaun ba lideransa ekonomia boot-liu iha Europa reflete konfiansa ne’ebé tau iha Ita-boot nia vizaun, perseveransa, no abilidade atu lidera nasaun iha tempu ida-ne’ebé partikularmente dezafiante ba
Alemaña, Europa no mundu,” Horta hateten iha nota nota ne’ebé Tatoli asesu husi mídia Palásiu Prezidensiál, ohin.
Horta dehan, momentu agora husu lideransa ne’ebé forte, esklaresidu ho kompromisu metin ba demokrátiku valór sira, dame, justisa sosiál no solidariedade internasionál.
“Ami fiar katak iha ita-boot nia lideransa, Alemaña sei kontinua hala’o papél esensiál ida hanesan pilár estabilidade nian no hanesan impulsionadór forsa ba koezaun iha Uniaun Europeia nia laran no iha orden internasionál ne’ebé luan liu,” nia dehan.
Timor-Leste valoriza tebes amizade no kooperasaun ho Repúblika Federál
Alemaña, bazeia ba prinsípiu sira-ne’ebé fahe ba respeitu ba direitu umanu, autodeterminasaun husi povu sira no dezenvolvimentu sustentável.
“Ami reafirma ami-nia prontidaun tomak atu hametin liután relasaun ida-ne’e iha área oioin interrese mútuo nian, tantu bilaterál no multilaterál. Ha’u hato’o ha’u-nia votu di’ak ba susesu kontinua ba Ita-Boot nia Exelénsia, Governu foun no povu Alemaña nian,” nia dehan.
TATOLI
