DILI, 10 Maiu 2025 (TATOLI) –Prezidente Repúblika, José Ramos Horta, hato’o ninia felisitasaun kmanek liu ba Sua Santidade Papa Leão XIV ba ninia eleisaun istóriku nu’udar Bispu Roma ba da-267 no Sumo Pontífise Supremu Igreja Katólika.
Kardeál Robert Francis Prevost, ne’ebé eleitu nu’udar Papa Leão XIV, mak pontífise Agustinianu dahuluk no papa daruak husi Amérika.
Moris iha Chicago iha tinan 1955, nia serbisu nu’udar misionáriu iha Peru ba tinan barak, hili dala rua nu’udar Priór-Jerál Orden Agustinianu, no serbisu nu’udar Bispu Chiclayo molok Papa Francisco nomeia nia nu’udar Prefeitu Dikastériu ba Bispu sira iha tinan 2023 no hili nia sai Kardinál iha tinan 2024.
Iha ninia karta ofisiál ba Vatikanu, Prezidente Ramos Horta rekoñese importánsia signitkativu husi eleisaun Papa Leão XIV nu’udar Papa dahuluk husi Estadus Unidus Amérika, destaka Sua Santidade nia servisu misionáriu ne’ebé boot iha América Latina no ninia servisu distinto iha Santa Sé.
“Eleisaun Sua Santidade nian marka momentu istóriku ida ba Igreja no ba mundu tomak. Nu’udar Amu-Papa dahuluk hosi Estadus Unidus Amérika, ho esperiénsia misionária kle’an iha Amérika Latina no servisu pastorál no administrativu ne’ebé kle’an iha Santa Sé nia laran, Sua Santidade personifika rikusoin husi universalidade Igreja nian no renova esperansa ba lideransa ne’ebé komprometidu ho diálogu, justisa, dame no dignidade umana,” Horta hateten liuhusi nota ne’ebé Tatoli asesu, ohin.
Prezidente espresa ninia admirasaun ba Amu-Papa nia bensaun apostólika dahuluk no ninia kompromisu ba Kreda misionária ida ne’ebé fó prioridade ba ema kiak sira, harii ponte sira, no promove karidade no enkontru fraternu.
Timor-Leste, nasaun predominantemente Katólika, hamutuk ho komunidade Katólika globál selebra nomeasaun i signifikativa ida ne’e. Prezidente garante ona ba Sua Santidade Timor-Leste nia afetu filiál ba Sé Apostólika no entrega ministériu Papa nian ba protesaun husi Nossa Senhora da Conceição Imaculada, Padroeira Timor-Leste nian.
Prezidente Ramos Horta hato’o ninia votu sinseru ba Sua Santidade Papa Leão XIV hodi kumpre ninia misaun sagrada nu’udar Susesór Pedro nian, Bispu Roma, no Pastór Universál Igreja nian.
Jornalista: Hortencio Sanchez
Editór: Florencio Miranda Ximenes
