DILI, 15 Maiu 2025 (TATOLI) – Komisaun Organizadora (KO) feira nasionál iha Portu Dili klarifika informasaun kona-ba dezentendimentu no lamentasaun artista lendáriu timoroan, Anito Matos, ne’ebé la konsege atu atua iha eventu ne’e husi KO.
“Normalmente sira iha prosesu ne’ebé liga ba event organizer iha atividade espozisaun feira nasionál ne’e, sempre loke prosesu ida ba artista sira kuandu hakarak performe iha eventu ne’e artista sira mós hatama proposta nune’e parte KO mak sei halo avaliasaun”, Diretór Unidade Aprovizionamentu, José R. Marçal, hanesan mós KO ba iha eventu espozisaun feira nasionál informa ba jornalista TATOLI, ohin.
“Ida-ne’e ita sei atende sira bazeia ba proposta ne’ebé sira hatama, hodi performe iha atividade entaun ne’e prosedimentu normál ne’ebé ita sempre halo iha eventu ida no liuhusi mós prosesu administrativu ka rejistrasaun ba artista sira”, Diretór José R. Marçal reforsa.
Notísia relevante:Feira nasionál iha portu Dili sei aberta husi PR ba públiku
Ezekutivu ne’e hatutan, dalaruma sira ladun hetan informasaun ne’ebé mak di’ak no tuir informasaun ne’ebé mak iha katak artista Anito Matos lori ninia proposta tarde ona bainhira KO taka ona.
“No desintendimentu ne’e entre artista ho artista la’ós ho fali KO no ministériu ne’e la’e. maibé ita normalmente halo servisu ne’ebé ita iha ho normál”, KO ne’e informa.
Nia kontinua haktuir, “Husi prosesu ne’ebé ita halo sira submete sira-nia proposta mai maibé tuir informasaun ne’ebé mak iha mós katak artista Anito Matos lori dokumentus ba MAE, lori mai mós dalaruma iha horiseik lorokraik, maibé prosesu rejistrasaun ne’e halo antes ona, entaun se ohin mak ita hahú ona ita-nia atividade mak nia foin mai submete horiseik ne’e atu halo oinsá?”
Tanba ida event organizer mak kaer eventu ne’e nia mak organiza no koordena ho sira nune’e bele partisipa mós iha eventu ida-ne’e.
“Entaun ne’e ami la to’o iha ne’ebá tanba sira mak atu provide malu. Lolós ne’e sira artista ho artista mak tenke ko’alia ba malu hodi fó oportunidade ba malu, importante atividade ne’e organiza oinsá hodi bele la’o ho di’ak no susesu”.
Bainhira konfirma ho Artista Lendáriu timoroan, Anito Matos, hatan katak hateten sira hetan pedidu direta husi Ministru Administrasaun Estatál, Tomas do Rosário Cabral katak atu sai mestre serimónia ka MC no aprezenta múzika iha eventu espozisaun referida.
“Ha’u hetan pedidu husi sua selénsia Ministru no ami mós hatama proposta, entaun momentu ami atu ba check sound maibé no to’o ikus sira KO kansela”, artista ne’e informa.
“Dalaruma tanba komisaun nia osan entaun ami mos labele halo buat ida no dalaruma mós iha ema seluk nia proposta ne’ebé di’ak liu nia,” nia konsidera.
Notísia relevante:Oras To’o Ona, atu ita hili…
Jornalista: Alexandra da Costs
Editór: Rafael Ximenes de A. Belo
