DILI, 15 Maiu 2025 (TATOLI)—Ministru Juventude Desportu Arte no Kultura (MJDAK), Nelyo Isaac Sarmento, hateten reabilitasaun estádiu munisipál Dili sei finaliza iha Juñu nia rohan, tanba iha fatin ne’e sei realiza jogu Komunidade Ko’alia lian Portugés (CPLP-sigla portugés) iha Jullu 2025.
Notísia Relevante: MJDAK-Federasaun desportiva ualu diskute prepararivu ba jogu CPLP
“Ha’u seidauk simu dadus kona-ba projetu ne’e atinje pursentu hira ona, maibé tuir kontratu ente empreza ho Governu projetu ne’e sei remata iha Juñu nia rohan. Agora daudaun, progresu di’ak tebes no empreza halo servisu maka’as tebes,” Ministru Nelyo hateten ba Agência TATOLI iha edifisiu MJDAK, Lecidere, kinta ne’e.
Nia dehan, Governu tau konfiansa ba empreza no fiar projetu referidu sei termina tuir kontratu ne’ebé selebra ona.
“Ita fiar iha fulan-Juñu nia rohan empreza termina servisu, agora sira taka ona zinku, monta kadeira sira iha tribun, sira sei hadi’a tan pista iha kampu ninin. Loron hira tan, sira sei monta iluminasaun (lampu) iha Estádiu laran, ita fiar sira konklui,” nia dehan.
Empreza ne’ebé halo reabilitasaun ba Estádiu ne’e mak Quatros Colegas Unipesoál, Lda. Daudaun ne’e, empreza utiliza osan privadu hodi halo reabilitasaun ba estádiu referidu. Parte ne’ebé hadi’a mak troka pista foun, hadi’a toilet no kanaliza bee ba estádiu laran, tau lampu haleu iha Estádiu laran no seluk tan.
Bainhira finaliza sei halo verifikasaun husi Ajensia Dezenvolvimentu Nasionál (AND) mak sei selu tuir kustu ne’ebé empreza gasta ba projetu ne’e.
Tuir oráriu fiksu ne’ebé iha jogu internasionál (jogu CPLP) ne’e sei realiza iha fulan-Jullu no sei hahú iha loron 17-27 ho modaliade hitu ne’ebé sei partisipa husi nasaun membru CPLP sira.
Modalidade hirak ne’ebé sei kompete iha jogu ne’e mak hanesan futeból kampu boot, basketból 3 vs 3, voleiból praia, xadrez, atletizmu, karate-do no taekwondo.
Notísia Relevante: Hahú aban Estadu membru jogu CPLP entrada ba sistema inskritu
Jornalista : Hortencio Sanchez
Editór : Cancio Ximenes
