DILI, 29 Abríl 2025 (TATOLI)-Koordenadór Jerál ba eventu Konferénsia Ministru Juventude no Desportu no XII jogu desportivu ba Komunidade sira husi Nasaun ne’ebé ko’alia lian-Portugés (CPLP, sigla portugés), Jorge Soares Cristovão, informa hahú aban, 30 Abríl to’o 15 Maiu 2025, kada Nasaun halo inskrisaun ba membru ne’ebé sei partisipa.
“Entry byname ba Estadu membru sira, ba modalidade ida-ida hahú loron 30 Abríl to’o 15 Maiu”, atuál Sekretáriu Estadu asuntu Arte no Kultura ne’e ba jornalista sira iha Delta Nova, tersa-ne’e.
Nia dehan tuir dadus ne’ebé simu, atleta no tékniku sira hamutuk 706. Depois hein bainhira entrega hotu naran mak foin hatene hira mak bele tuir.
Nia mós informa horisehik komisaun aprova ona medalla no tasa. “Ami diskute ona no aprova ona horiseik para tempu badak nia laran ita prosesu ba nia produsaun”.
Jogu CPLP ba tinan ne’e sei realiza iha Jullu hahú 17-27 sei partisipa husi nasaun membru sira hanesan, Portugál (partisipante 101), Brazíl (partisipante 101), Guine Bissau (partisipante 61), Guine Ekotoriál (partisipante 35), Mosambike (partisipante 70), Saun Tome no Prinsípe (partisipante 35), Kabuverde (partisipante 101), Ángola (partisipante 101) no Timor-Leste (partisipante 101).
Totál orsamentu ba jogu CPLP husi preparasaun to’o termina, Governu tau ona orsamentu tinan 2025 nian ho montante millaun $3.7.
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Enkontru tékniku ba aprovasaun medalla no tasa derije husi Ministru Juventude, Desportu, Arte no Kultura (MJDAK), Nelyo Isaac Sarmento, Prezidenti Komisaun Organizadora no Kordenadór Jerál eventu CMJD no XII Jogu Desportivu CPLP 2025, Jorge Soares Cristovão, Diretór Jerál Desportu, João M. Rodrigues, Diretór Jerál Servisu Koorporativu, Isabel Adalziza Fatima Rodirigues Ferreira, no mós Diretór Jerál Arte no Kultura, Gil Paulino Oliveira.
Enkontru ne’e diskute mos ekipamentu sira ne’ebé atleta sira sei uza durante iha sentru treinamentu to’o loron eventu.
Tuir informasaun ne’ebé TATOLI sita husi pájina ofisiál MJDAK, ministru husu ba seksaun hotu atu kontinua halo koordenasaun ba servisu hodi lori susesu ba eventu importante ne’e.
Enkontru ne’e hetan prezensa husi Xefi Gabineti MJDAK, Egas Barros Guteres Godinho, Xefi Gabineti SEAK, Francisco Tae-Mau, no Diretór Nasionál sira ne’ebe responsavel nu’udar koordenadór iha komisaun organizadora.
Notísia relevante: MJDAK-Telkomsel asina akordu kooperasaun ba jogu CPLP
Jornalista : Osória Marques
Editora : Rita Almeida
