CCTL esporta kafé hamutuk kontentór 37 ba nasaun lima
DILI, 16 Maiu 2025 (TATOLI) – Iha tinan-2024, Kooperativa Kafé Timor-Leste (CCTL, sigla portugés) esporta rezultadu produsaun kafé hamutuk kontentór 37 ba nasaun lima hanesan, Japaun, Xina, Austrália, Nova-Zelándia, no Ámerika, Prezidente CCTL, Mario Soares relata.
“Kada container (kontentór) kompostu tonelada 19 no fa’an tuir kilo. Kilo ida hetan USD$4”, Prezidente ne’e informa ba jornalista TATOLI iha edifísiu CCTL, Bidau-Lesidere, Dili, ohin.
Kona-ba kestaun Prezidente Estadu Unidu Amérika (EUA), Donald Trump impoin tarifa 10% ba prosesu esportasaun produtu Timor-Leste, CCTL la iha dúvida no garante katak nafatin halo esportasaun tanba kafé importante no ema hakarak sosa kafé.
“Ita nafatin esporta kafé ba iha Ámerika tanba iha kompana rua mak babain sai parseiru hodi sosa kafé husi ita ne’e mak kompaña Starbug no kompaña Royal Coffe”, nia afirma.
Prezidente CCTL, Mario Soares dehan, kafé ne’ebé sira fa’an barak liu ba empreza rua ne’e no dalaruma empreza sira ne’e bele husu to’o tonelada 100 maibé tanba produsaun kafé la to’o entaun sira fó tuir kbiit.
Dirijente ne’e informa, antes atu halo exportasaun, CCTL iha laboratóriu ki’ik ida hodi halo prosesaun ba kafé maran nian, ne’e lokaliza iha Bidau-Akadiruhun, Dili, sira sei halo teste produsaun kafé ne’e hafoin haruka ninia amostra (sample) ba iha empreza sira ne’ebé hakarak sosa kafé.
“Baibain ita haruka tiha ninia sample ne’e ba kompaña. Sira haree katak ida-ne’e bele ona mak ita foin esporta ba sira”, nia informa.
Maibé sira mós hakarak husu nafatin ba Governu atu harii tezte laboratóriu orgániku ne’ebé mak kualidade liután hodi halo teste ba produsaun sira tanba Governu seidauk harii laboratóriu ida-ne’ebé di’ak atu detekta kona-ba produtu orgániku ne’e.
Notísia relevante:CCT apresia Governu halo reabilitasaun planta kafé ektare 8.000
Jornalista: Alexandra da Costa
Editór: Rafael Ximenes de A. Belo
