ME prevé rihun $300 ba akizisaun ekipamentu informátika ba ESTV hitu
DILI, 16 Maiu 2025 (TATOLI) – Ministériu Edukasaun (ME) liuhusi Diresaun Ensinu Tékniku Vokasionál, halo akizisaun ba ekipamentu informátika ba eskola ESTV hitu (7).
“Kona-ba ekipamentu informátika liuliu ba komputadór no mós projetór tinan ida-ne’e. Ita sei fahe tán komputadór ba eskola hitu. Agora ita tama ona akizisaun materiál ne’ebé ita la’o hela iha prosesu aprovizionamentu, bainhira akizisaun hotu ita sei hola komputadór hitu,” Diretór Nasionál Ensinu Tékniku Vokasionál, Fernando Mouzinho, dehan iha nia knaar fatin Vila Verde, sesta ne’e.
Nia hatutan, kada eskola propoin komputadór 35, se hanesan ne’e vezes ba 7 ne’e hira depois sei fahe projetór ba ida ba kada eskola ida.
“Tinan ida-ne’e ami sei hola projetór ba eskola 30 tanba ita-nia objetivu ne’e hakarak durante ita-nia servisu ne’e ita tenke halo hotu ba eskola hotu hotu,” nia katak.
Nia dehan, polítika Ministériu Edukasaun ba oin ne’e kada saladeaula tau projetór ida-ida. Tanba eskola Tékniku Vokasionál iha 30 ne’e iha saladeaula hamutuk 400.
“Agora ita-nia polítika mak ne’e kada sala iha projetór ida entaun agora eskola tékniku vokasionál ami konta hamutuk porvolta saladeaula 400. Se tinan-tinan ita konsege hola 100-reisn, mak nune’e tinan haat bele hola hotu ba eskola,” nia dehan.
Dirijente ne’e hatete, objetivu husi polítika sosa ekipamentu informátika ne’e atu fasilita manorin no estudante iha prosesu aprendizajen.
“Tanba ita-nia hakarak ne’e eskola hotu-hotu uza ona projetór atu sira-ne’e ba leno de’it, tenknolojia ne’e tenke la’o iha eskola ona. Eskola balun la’o tiha ona, sira uza ona projetór iha sira-nia saladeaula, ezemplu eskola ESTV ida iha Maliana, sira-nia sala ne’e kuaze monta hotu ona projetór nune’e profesór sira ba ne’e uza de’it,” nia katak.
Nia relembra, tinan kotuk halo ona ekipamentu informátika ba ESTV lima no tinan ne’e hola tán eskola ESTV hitu, tinan oin mai fali hola tan eskola ESTV hamutuk 10.
“Tanba ita-nia objetivu ne’e distribui komputadór ne’e ba eskola hotu-hotu hala’o polítika naran dijitalizasaun tenke la’o entaun ami hola ona komputadór depois mós ami hola ona projetór ba eskola hotu-hotu ne’e nune’e eskola hotu-hotu labele uza zís ona”, nia konklui.
Jornalista: Osória Marques
Editór: Evaristo Soares Martins
