DILI, 17 Maiu 2025 (TATOLI)–Federasaun Motorsiklizmu Timor-Leste (FMCTL-sigla portugés), sábadu ne’e, realiza Eventu Internasionál Motocross atu selebra Loron Restaurasaun Independénsia RDTL ba dala XXIII, 20 Maiu 2025.
Vise-Prezidente FMCTL, Helder Vieira Aniceto, informa, sira realiza eventu ida-ne’e aleinde atu komemora Loron Restaurasaun Independénsia, atu prepara mós crosser sira ba eventu internasionál.
“Eventu internasionál ida-ne’e partisipa crosser husi Indonézia no mós Austrália,” Vise FMCTL informa ba jornalista TATOLI iha Dolokoan, Kristu-Rei, Dili, sábadu ne’e.
Eventu ida-ne’e, Helder esplika, hetan apoiu husi Governu liuhusi Ministériu Juventude, Despostu, Arte no Kultura (MJDAK) no mós patrosinadór 31, enkuantu totál orsamentu ba atividade ne’e hamutuk rihun $400.
Iha biban ne’e, Ministru Juventude, Desportu Arte no Kultura, Nelio Isaac Sarmento, hateten MJDAK apoia atividade ho orsamentu $8000-resin.
Governante ne’e hatutan, aleinde tanba komemora Loron Restaurasaun Independénsia, fó mós oportunidade ba joven sira-ne’ebé gosta aplika modalidade ida-ne’e hodi hatudu sira-nia talentu.
Iha oportunidade ida-ne’e, crosser husi ekipa Trail Maute Clube, Alexandrinho Pires da Costa, informa liuhusi atividade ne’e bele promove sira-nia talentu no mós sira bele haree no aprende fali skill husi ema seluk liuliu crosser sira husi Indonézia no Austrália hodi kompete iha nível internasionál.
“Maski ida-ne’e foin primeiravéz ba ha’u hodi tuir eventu ne’e, maibé ha’u nafatin iha konfiansa lakon ka manán importante bele hatudu ha’u-nia talentu tanba durante ne’e ami halai de’it iha ai-laran,” nia subliña.
Nia haktuir, daudaun ne’e nia kompete iha klase inísiu (pemula) no standart.
Totál crosser ne’ebé kompete iha kompetisaun ne’e hamutuk 100 kompostu husi idade juveníl (maizumenus idade 30 mai kraik), iha mós crosser Indonézia na’in-rua, husi Austrália na’in-haat, restante ne’e timoroan.
Eventu ne’e fahe ba kategoria klase 14 hanesan, klase espesiál grade A, klase estandart, klase juveníl, klase FFA, klase espesiál grade B, klase standart seniór, klase 200 4tk, klase standart pemula, klase sport 2tk, klase espesiál open internasionál, klase ex kroser, klase super no klase sponsor.
Eventu referidu hala’o durante loron rua (17-18 Maiu). Manán-na’in sira husi klase idak-idak sei simu prémiu $1.500.
Jornalista: Alexandra da Costa
Editór: Xisto Freitas da Piedade
