DILI, 17 Maiu 2025 (TATOLI)—Costa Competetion (CC) loke Kompetisaun Men’s Fitness, iha Timor Plaza, sábadu ne’e, ho objetivu atu komemora Loron Restaurasaun Independénsia ba dala XXIII, 20 Maiu 2025.
Kompetisaun Men’s Fitness ne’e iha kategoria tolu hanesan Men’s Fitness Junior, Men’s Sport Fíziku, Men’s Atlétiku Fíziku.
Prezidente Komisaun Organizadora ba eventu ne’e, Amin Gama, hateten objetivu husi eventu ne’e aleinde Komemora Loron Restaurasaun Independénsia, atu promove mós atleta sira-nia talentu.
“Kada tinan ami sempre loke kompetisaun ne’e ba feto no mane, maibé tinan ida-ne’e loke espesiál ba mane de’it,” nia informa ba jornalista TATOLI.
Orsamentu hodi organiza eventu ne’e, Amin esplika, hamutuk $10.000, apoiadu husi Governu liuhusi Ministériu Juventude, Desportu, Arte no Kultura (MJDAK) no mós patrosinadór sira seluk hamutuk na’in-24.
“Husi osan hirak-ne’e ami fahe ba kategoria tolu, uza ba aluga palku, uza ba sosa tasa, medalla inklui halo sertifikadu hodi fahe ba atleta sira,” nia subliña.
Manán-na’in husi klube Bascame, Bernardo Soares, sente orgullu sai manán na’in ba kompetisaun Men’s Fitness ne’e tanba durante ne’e nia treinu ho sériu no kontrola hahán sira (dieta).
“Dalaruma ha’u han mós to’o tanis tanba dieta, tanba dalaruma ema dehan ita sosa hahán labele. Hahán ne’e da’an de’it, maibé nia rezultadu ikus mak agora daudaun ha’u hetan primeiru lugár,” nia hateten.
Atleta ne’e haktuir, ninia preparasaun ba kompetisaun ida-ne’e durante semana tolu tanba nia iha atividade balun katak atu bá Jakararta, maibé nia kansela tiha tanba laiha fundu entaun nia kontinua ho ninia atividade desportu ida-ne’e hodi koko dieta durante semana tolu.
“Maski ha’u dieta tarde ona maibé iha Nai Jezús nia matan buat hotu la’ós difísil no antes ne’e mós sai hanesan personál training ida, entaun kompetisaun ne’e loke ha’u mós kontinua treinu no komesa dieta ona,” Bernardo tenik.
Nia hatutan katak kompetisaun ida-ne’e la’ós foun tanba antes ne’e nia mós kompete ba dahaat ona no foufoun inklina-aan iha kompetisaun ne’e seidauk hatudu rezultadu ne’ebé di’ak, maibé nia nafatin esforsu no iha kompetisaun datoluk nia konsege hetan best performance no ohin loron foin sai manán-na’in.
Entretantu, totál atleta husi kategoria tolu ne’e hanesan Fitness Junior hamutuk 21, Men’s Sport Fíziku hamutuk na’in-sia (9) no Men’s Atlétiku Fíziku na’in-ualu (8).
Jornalista: Alexandra da Costa
Editór: Xisto Freitas da Piedade
