BAUKAU, 20 Maiu 2025 (TATOLI)—Kámara Komérisu Indústria Timor-Leste (CCI-TL-sigla portugés) konsidera Selebrasaun Loron Restaurasaun Independénsia RDTL ba dala XXIII, 20 Maiu 2025, sai momentu importante atu halo preparasaun dezenvolve setór ekonomia iha Munisípiu Baukau.
Prezidente CCI-TL Munisípiu Baukau, José Januario dos Reis ‘Noqy’, hateten selebrasaun loron nasionál ne’e nu’udár parte atu entidade hotu halo reflesaun ba setór sira-ne’ebé hala’o ona no hadi’a aan di’ak liután nune’e bainhira implementa podér lokál no desentralizasaun administrativa iha kada munisípiu, Baukau preparadu ona atu hadi’a ekonomia.
“Preparasaun la’o nafatin no kualker setór preparadu importante mak tenke sólidu hodi dezenvolve di’ak liután setór ekonomia lokál iha Baukau,” Prezidente CCI-TL Munisípiu Baukau hateten iha resintu administrasaun Munisipál Vila Nova, Baukau, tersa ne’e.
Noqy argumenta Baukau oan sempre prontu no preparadu liuliu setór privadu sempre iha kompromisu apoia investimentu hanesan área agrikultura no turizmu ne’ebé iha Munisípiu Baukau sai poténsia ba futuru bainhira Autóridade Munisipál iha ona podér desentralizasaun administrativa.
Noqy hato’o parabéns ba povu Timor-Leste espesiál komunidade Baukau ne’ebé liuhosi Autóridade Administrasaun Munisipál hamutuk ho entidade sira organiza selebrasaun festa Restaurasaun Independénsia ho ksolok no partisipativu.
Mezmu nune’e, tuir nia, presiza prepara no kompleta mak lejizlasaun sira inklui infraestrutura nune’e bele fasilita entidade hotu hodi hamutuk dezenvolve no krexe ekonomia iha futuru.
Nia konsidera setór ekonomia iha Baukau presiza prezerva no asegura liuliu lamenta investimentu ne’ebé fó ameasa ba setór privadu sira tanba Baukau-oan iha kapasidade atu kontribui dezenvolve hodi hasa’e ekonomia iha Baukau.
“La presiza atu fasilita investimentu ne’ebé progresivu no agresivu tanba Baukau-oan mós iha kapasidade,” Noqy argumenta.
CCI-TL Baukau kontinua fó pareser ba governu sentrál no lokál kona-ba setór ekonomia ligadu ho investimentu sira-ne’ebé iha intesaun hamate setór privadu lokál hanesan deside investimentu ne’ebé fó afavór ba Baukau-oan.
Entretantu, Selebrasaun Loron Restaurasaun Independénsia ba tinan ne’e iha Baukau hahú serimónia isár bandeira, kontinua kedas palku animasaun, jogu tradisionál no hetan partisipasaun husi Autóridade lokál, veteranu, autóridade seguransa, estudante no komunidade Baukau Vila.
Jornalista: Natalino Belo
Editór: Xisto Freitas da Piedade
