DILI, 21 Maiu 2025 (TATOLI)—Deputadu Membru Komisaun B iha Parlamentu Nasionál (PN) ne’ebé trata asuntu Negósiu Estranjeiru no Defeza ho Seguransa, Natalino dos Santos, kongratula misaun Forsa Manutensaun Pás Organizasaun Nasaun Unida (ONU), ne’ebé mundu tomak inklui Timor-Leste sei komemora iha loron 29 Maiu.
“Hakarak kongratula misaun Nasaun Unida nian ne’ebé ita hatene katak depois post referendu ita hetan apoiu no solidariedade, ne’ebé sira mai mantein pás ba iha ita-nia rai no ohin loron ita-nia nasaun sai hanesan Estadu soberanu no agora ita tama ona faze konstrusaun Estadu no dezenvolvimentu nasionál,” Deputadu Natalino dos Santos, hato’o iha resintu PN, kuarta ne’e.
Nia espera ho komemorasaun loron ne’e, parte hotu bele kontribui liután pás iha rai-laran no iha mundu tomak.
“Loron Manutensaun Pás ida-ne’e importante tebes tanba kontribuisaun Nasaun Unida nian, liuliu oinsá atu estabelese pás no estabilidade iha nasaun sira ne’ebé post konflitu ida-ne’e importante tebes,” nia akresenta.
Notísia relevante : TL propoin ONU transforma Intelijénsia Artifisiál ba manutensaun pás-seguransa internasionál
Deputadu ne’e konsidera, misaun ne’e importante tebes no orgullu ba misaun Manutensaun Pás.
“Liuliu tanba sira-nia papél ne’e importante tebes bainhira iha post konflitu, sira tun atu mantein no restaura filafali pás no estabilidade iha nasaun sira ne’ebé hetan perturbasaun, torturasaun, no violénsia,“ nia katak.
Deputadu ne’e relembra filafali katak bainhira iha tinan 1999 hafoin Konsulta Populár kuaze disturbasaun tomak iha territóriu, ne’ebé ikus mai iha 20 Setembru 1999 misaun INTERFET ne’ebé tun mai no bele restaura filafali situasaun pás no hakmatek.
“Nune’e, ita bele inísiu ba restaurasaun indepedénsia, depois krize 2006, nune’e mós sira-nia prezensa importante tebes atu estabelese no restaura fali situasaun ne’ebé inkonduzivu sai fali situasaun konduzivu,” membru Komisaun B katak.
Loron mundiál ba Forsa Manutensaun Pás ONU hodi hato’o omenajen ba soldadu sira ne’ebé hala’o ezersísiu atu suporta pás no seguransa internasionál no proteje ema vulnerável sira moris iha risku to’o lakon vida.
Tema komemorasaun ba tinan 2025 mak ‘Futuru Manutensaun Pás’, destaka ba kontribuisaun importante fó husi forsa Militár, Polísia no Sivíl ba Manutensaun Pás durante tinan naruk iha dékada ualu.
Loron ida-ne’e sintetiza espíritu progresu no asaun koletivu atu halo mundu ida-ne’ebé iguál, justu no sustentável liu.
Relembra katak, iha membru Forsa Manutensaun Pás na’in-26 mak lakon vida iha tinan 2024, na’in-lima lakon vida iha insidente, no membru 4.430 fó sira-nia vida iha tempu naruk ba Manutensaun Pás.
Loron ida-ne’e deklara liuhusi rezolusaun 57/129 ne’ebé adota husi Asembleia Jerál ONU iha loron 11 Dezembru 2002.
Jornalista : Nelson de Sousa
Editora : Julia Chatarina
