AILEU, 23 Maiu 2025 (TATOLI) – Ministériu Obra Públika (MOP), kontrata empreza BTK Group konstrui ona ponte no moru protseaun iha Betudak (air terjun) suku Fatisi, postu administrativu Laulara, munisípiu Aileu.
Supervizór empreza BTK, Afonso de Deus, hateten, konstrusaun ponte ne’e rasik konstrui hahú iha fulan Fevereiru 2025 no daudaun atinje ona 80% tuir kontratu sei entrega iha fulan Agostu 2025.
“Ami hahú serbisu iha fulan Fevereiru agora projetu atinje ona 80% ne’e tanba agora atu monta box cover beton bainhira finaliza tau hotu tau alkatraun finaliza ona,” Afonso de Deus, ba Tatoli, sesta ne’e.
Nia esplika, bainhira empreza finaliza obra referida sei kompleta ho fatin parrajen (parkiran) inklui asesores lampu lighting uza solár panel.
Nia subliña, tuir kontratu ponte referida ho nia metru luan hamutuk 23 no metru naruk hamutuk 8 no moru proteaun hamutuk metru 260, ida atu satan rai monu no estrada, moru ne’e rasik iha estrada leten kraik sorin loos no karuk iha hotu.
“Tékniku husi Indonézia totál orsamentu hamutuk $800.000 ida ba projetu tomak inklui asesores hanesan lampu sira ne’e,” nia tenik.
Bainhira empreza finaliza obra referida sei fasilita movimentasaun transporte públiku no ema nian husi munisípiu sira hanesan; Aileu, Ainaru, Manufahi no Kovalima.
Jornalista : Arminda Fonseca
Editór : Evaristo Soares Martins
